Tags-Manzil

ik azāb-e-ḳhauf-e-be-samtī bhī in āñkhoñ meñ hai
apnī manzil aur apnī rahguzar hote hue

aisī manzil pe aa gayā huuñ jahāñ
tire ġham kā hī ik sahārā hai

baḌh jā.egī ai ham-safaro dūrī-e-manzil
guzrī huī bātoñ ko na doharāo safar meñ

hamārī qismat kā pher dekho talāsh-e-manzil meñ umr guzrī
magar jahāñ se chale the kashfī vahīñ pe ham ḳhud ko pā rahe haiñ

bahut nazdīk thī manzil hamārī
magar sab rāste daldal rahe the

haram se mai-kade tak manzil-e-yak-umr thī saaqī
sahārā gar na detī laġhzish-e-paiham to kyā karte

milegā manzil-e-maqsūd kā usī ko surāġh
añdherī shab meñ hai chīte kī aañkh jis kā charāġh

sharm sī nazar dil kī hai uThtī nahīñ nigāh-e-shauq
ishq kī manziloñ meñ ik manzil-e-infi.āl hai

vo moḌ mere safar kā hai nuqta-e-āġhāz
fareb-ḳhurda-e-manzil hue jahāñ rah-rau

ai ahl-e-junūñ duur nahīñ manzil-e-shīrīñ
haañ biich meñ ik marhala-e-koh-kanī hai

jo manzil tak jā ke aur kahīñ muḌ jaa.e
tum aise raste ke dukh se nā-vāqif ho

na jaane kaun sī manzil pe ishq aa pahuñchā
duā bhī kaam na aa.e koī davā na lage

subuk-pā havā kī tarah maiñ guzartā rahā
subuk-pā havā kī kahīñ koī manzil nahīñ

mere junūn-e-shauq kī manzil nahīñ koī
ya.anī rah-e-talab meñ sarāpā talāsh huuñ

kyā huā husn hai ham-safar yā nahīñ
ishq manzil hī manzil hai rasta nahīñ

manzil nahīñ huuñ ḳhizr nahīñ rāhzan nahīñ
manzil kā rāsta huuñ mujhe yaad kījiye

duur hai manzil mirī ik jaam ai pīr-e-muġhāñ
raah meñ ā.eñge ka.aba aur but-ḳhāna abhī

is jagah pe sab ne haath chhoḌ Daalā
ye maqām shāyad manzil-e-vafā hai

ai ishq terī dūsrī manzil bhī hai kahīñ
marnā hai ibtidā meñ to kyā intihā meñ hai

yuuñ maiñ āsūda-e-manzil huuñ ki ab gard-e-safar
chūmtī hai mirā naqsh-e-kaf-e-pā mere ba.ad