Tags-Manzil

qadam to rakh manzil-e-vafā meñ bisāt khoī huī milegī
vahīñ kahīñ naqsh-e-pā kī sūrat paḌī huī zindagī milegī

ham mahv-e-justujū the 'sahar' mustaqil magar
manzil milī na phir bhī muqaddar ajiib thā

pahle manzil dikhā.ī mujhe aur phir
band chāroñ taraf rāsta kar diyā

vasvase dil meñ na rakh ḳhauf-e-rasan le ke na chal
azm-e-manzil hai to ham-rāh thakan le ke na chal

aise bhī marāhil aate haiñ is manzil-e-ishq kī rāhoñ meñ
jab ashk bahāte haiñ ḳhud bhī us ko bhī rulā.e rakhte haiñ

phir ik gum-karda-rāh-e-zindagī ko mil ga.ī manzil
sujūd-e-shukr-e-be-pāyāñ adā karne kā vaqt aayā

apne hī gird maiñ ne kiyā umr bhar safar
bhaTkāyā mujh ko jis ne vo manzil bhī maiñ hī thā

aur hoñge jin ko manzil mil ga.ī
justujū tark-e-safar tak aa ga.ī

ḳhvāhisheñ duniyā kī bār-e-dosh-o-gardan ho ga.iiñ
rafta rafta manzil-e-uqbā kī rahzan ho ga.iiñ

raah kī zulmatoñ se manzil tak
ik ujālā hai hausla us kā

ham ko manzil ne bhī gumrāh kiyā
rāste nikle ka.ī manzil se

rāste kab gard ho jaate haiñ aur manzil sarāb
har musāfir par tilism-e-rahguzar khultā nahīñ

nigāh ham-safaroñ par rakhūñ sar-e-manzil
ki marhala hai ye ik dūsre se Darne kā

shāyad koī manzil nahīñ is raah meñ paḌtī
vāpas nahīñ aatā koī yādoñ ke safar se

maiñ terī yaad ke jaadū meñ thā sahar mujh ko
na-jāne kaun sī manzil pe lā ke chhoḌ ga.ī

numūd-e-sub.h se pahle sar-e-manzil pahuñchnā hai
dhuñdlakoñ se ye ghabrāhaT amīr-e-kārvāñ kab tak

manzil-o-rāh meñ kabhī itnā to fāsla na thā
rāhbaro ḳhatā-muāf ye koī rāhbarī nahīñ

rahzanoñ ke ġhol idhar the rahbaroñ kī bhiiḌ udhar
aa ga.e manzil pe ham ye mojaza kyūñkar huā

ik husn-e-tasavvur hai jo ziist kā sāthī hai
vo koī bhī manzil ho ham log nahīñ tanhā

aql-o-dil īzād ho kar ho ga.e
shash-jihāt-o-haft-manzil tābnāk