Tags-Manzil

ham-safar ban ke mile yā bane rahbar apnā
koī to pūchhe ki manzil kā patā huuñ maiñ bhī

rāhbar raah musāfir ko dikhā detā hai
vahī manzil pe pahuñch jaa.e zarūrī to nahīñ

hamāre paañv ke chhāle hamārī manzil tak
ubal ubal ke nayā rāsta banāte haiñ

manzil-e-faqr-o-fanā jā-e-adab hai ġhāfil
bādshah taḳht se yaañ apne utar letā hai

ye bār-e-ma.asiyat manzil kaḌī aur shām-e-tanhā.ī
chale haiñ kyā samajh kar ham bhī rusvā-e-jahāñ ho kar

vo pahlā ziina thā manzil jise abas jaanā
kuchh āgahī ke marāhil the aur dhyān ke baad

hujūm-e-mā-sivā se bach ke manzil-e-murād tak
pahuñch gayā huuñ rahzanoñ se raah pūchhtā huā

mujh se hī pūchh rahā hai mirī manzil kā pata
mere rahbar kī zarā rāh-barī to dekho

koī manzil hai ki duurī meñ chhupī hai kab se
koī rasta hai ki paañv meñ ghirā rahtā hai

jinheñ shauq-e-talab hai aur jinheñ zauq-e-tajassus hai
unheñ koh-o-bayābāñ manzil-e-yak-gām hai saaqī

kise milī hai yahāñ rāh-e-shauq meñ manzil
musāfiroñ ko hamesha thakan meñ rahnā hai

ye sañg-e-mīl bhī pahle koī bhaTkā musāfir thā
jise apnī hī manzil DhūñDne meñ lag ga.e barsoñ

sūraj ke ufuq hote haiñ manzil nahīñ hotī
so Dhaltā rahā jaltā rahā chaltā rahā maiñ

nazar se duur hai 'jazbī' savād-e-manzil tak
na jaane zauq-e-talab meñ mire kamī kyā hai

tirī dhun meñ kosoñ safar karne vaale
tujhe sañg-e-manzil-numā jānte haiñ

manzil manzil dhokā hai
mere paañv safar meñ rah

is husn-e-zan pe ham-safaroñ ke huuñ pā-ba-gil
mujh be-ḳhabar ko rahbar-e-manzil banā diyā

sar-e-manzil aa ke patā chalā ki qadam qadam pe fareb thā
kahīñ ham-safar kī umiid meñ kahīñ ham-safar kī talāsh meñ

jo yahī junūñ hai to mil chukī hameñ manzil-e-ġham-e-āshiqī
usī rahguzar se guzar ga.e usī rahguzar kī talāsh meñ