Tags-Manzil

jo chal sako to chalo ki rāh-e-vafā bahut muḳhtasar huī hai
maqām hai ab koī na manzil farāz-e-dār-o-rasan se pahle

sūraj Duub chalā 'nāsir'
aur abhī manzil hai duur

koī rasta hai na koī manzil
gard huuñ aur sar-e-bād huuñ maiñ

kab baiTh sake manzil-e-hastī ko pahuñch kar
aage jo baḌā is se hai vo ek safar aur

kahīñ manzil se bhaTak jaa.e na dīvāna-e-gul
jāda-e-shahr-e-bahārāñ meñ bichhā do kāñTe

maiñ huuñ nā-mo'tabar manzil kī ḳhātir mo'tabar rah par
vajūd-e-ḳhvāhish-e-jāñ par duāoñ kā libāda hai

hameñ āsāniyoñ se pyaar thā aur log kahte the
agar manzil se haT jaa.eñ to har rasta kushāda hai

tere baad aisī bhī tanhā.ī kī manzil aa.ī
ki mirā saath kisī rāhguzar ne na diyā

rind-o-zāhid donoñ pūchheñge barābar dekhnā
tafarqe un meñ dorāhe tak hai manzil ek hai

manzil hai shahryārī-e-ālam to dekhnā
is raah meñ hazāroñ qabīle fanā hue

mafar nahīñ ġham-e-duniyā se 'āftāb-husain'
bahut kaThin hai ye manzil magar zarūrī hai

kal use shak thā 'renū' manzil kā
aaj har shaḳhs kārvāñ se mile

vo kyā manzil jahāñ se rāste aage nikal jaa.eñ
so ab phir ik safar kā silsila karnā paḌegā

haram kahtā hai kuchh dair-e-butāñ kuchh aur kahtā hai
tarīq-e-manzil-e-vāraftgāñ kuchh aur kahtā hai

ban gayā rah-numā-e-manzil
vo bhaTaknā tire saudā.ī kā

miTte jaate haiñ rāh-e-umr meñ dost
mil rahe haiñ nishān manzil ke

ho jis tarah guzar āñdhī kī tarah manzil se
qadam baḌhā talab-e-tez-gām paidā kar

apnī manzil to banā lete haiñ duniyā vaale
maiñ kahāñ jā.ūñ tirī jalva-gah-e-nāz ke ba.ad

zindagī ai zindagī tai ho masāfat kis tarah
samt-e-manzil le gayā vo rāsta bhī le gayā

ek manzil hai magar raah ka.ī haiñ 'az.har'
sochnā ye hai ki jāoge kidhar se pahle