Tags-Manzil

justujū saath hai sham-e-rah-e-manzil ban kar
apnī be-rāh-ravī bhī hai gavārā mujh ko

sū-e-adam phire chale jaate haiñ qāfile
sab ham-safar haiñ ziist hai manzil se dil uchāT

sochtā huuñ kaun sī manzil hai ye idrāk kī
zarra zarra āshnā hai pattā pattā āshnā

vo log mirī tarz-e-safar jāñch rahe haiñ
manzil kī taraf jin ko humaknā bhī na aayā

sahā jaatā nahīñ ab ranj-e-mahrūmī-e-manzil
safar hī tark kar duuñ ye irāda kar rahā huuñ

mubārak ho jo tū manzil-ba-manzil baḌh rahā hai
to maiñ bhī yaad tujh ko jaada jaada kar rahā huuñ

mirī justujū kā hāsil mirā shauq-e-vālihāna
mirī aarzū kī manzil na chaman na āshiyāna

mohabbat kī har ik manzil pe sahrā-e-adam niklā
ḳhizar bhī saath de sakte nahīñ har gaam par merā

dilkash ye manzil āḳhir dekhā to aah niklī
sab yaar jā chuke the aa.e jo ham safar se

ye hirs-o-havā kī manzil hai ai rāh-ravo hushyār zarā
jab haath rupahle baḌhte haiñ rahbar ke qadam bik jaate haiñ

manzil se be-niyāz chale jā rahe haiñ log
bhaTke huoñ kī aañkh ke patthar meñ kuchh nahīñ

shikasta-pā ko muzhda ḳhastagān-e-rāh ko muzhda
ki rahbar ko surāġh-e-jāda-e-manzil nahīñ miltā

kaTte bhī chalo, baḌhte bhī chalo, baazū bhī bahut haiñ sar bhī bahut
chalte bhī chalo ki ab Dere manzil hī pe Daale jā.eñge

jo ḳhud vāqif nahīñ manzil se apnī
ḳhudā baḳhshe hamārā rahnumā hai

ma.āl-e-justuju-e-zauq-e-kāmil dekh letā huuñ
uThāte hī qadam āsār-e-manzil dekh letā huuñ

us ne manzil pe lā ke chhoḌ diyā
umr bhar jis kā rāstā dekhā

yakāyak manzil-e-āfāt-e-ālam se guzar jaanā
Dareñ kyuuñ maut se jab hai isī kā naam mar jaanā

kaun sī manzil-e-hayāt hai ye
dil fasurda ḳhamosh maiḳhāne

kyā mirī taqdīr meñ manzil nahīñ
fāsla kyuuñ muskurā kar rah gayā