Tags-Manzil

hamārā daur mukammal nahīñ huā lekin
talāsh-e-rāh na koī talab hai manzil kī

parvarda-e-sāhil kyā jaane āsūda-e-manzil kyā samjhe
jo duur haiñ sāhil-o-manzil se un kī kyā hālat hotī hai

karūñgā umr bhar tai rāh-e-be-manzil mohabbat kī
agar vo āstāñ is raah kī manzil na ban jaa.e

tumheñ yaqīñ hai ki manzil hai do hī qadmoñ par
mujhe ye Dar hai kahīñ rāsta na kho jaa.e

har marhal-e-būd thā nābūd kī manzil
lekin tire hote hameñ lagtā thā hamīñ haiñ

ye saare raste mujhe khīñchne lage hai ab
kuchh itnā chīḳh ke manzil pukārī hai maiñ ne

pā.egā jald manzil-e-maqsūd bil-yaqīñ
jaarī jo kārvān hai urdū zabān kā

duur itnī bhī na thī manzil-e-maqsūd magar
yuuñ paḌe paañv meñ chhāle ki safar kar na sakā

is dil ko shaad rakhne kī ḳhidmat milī mujhe
ġham-hā-e-rozgār kī manzil kaheñ jise

ābla-pā rahgīroñ ko jharnoñ se dil bahlāne bhī de
azm-e-javāñ ko aur javāñ kar apnī manzil duur hai pyāre

gar munāsib nahīñ mujh ko manzil mile
hai safar lāzmī kyuuñ ḳhudā phir mujhe

saarī ḳhilqat raah meñ hai aur ho manzil meñ tum
donoñ aalam dil se bāhar haiñ faqat ho dil meñ tum

gulshan gulshan vīrānī hai jañgal jañgal sannāTā
haa.e vo din jab har manzil meñ shorish-e-ġham kā kaal na thā

mujhe yaqīñ hai ki mere bas meñ hai manzil-e-shauq par utarnā
mujhe bahut hausla diyā hai mirī mohabbat mire ḳhudā ne

ye rāh-e-mohabbat hai sab is meñ barābar haiñ
bhaTke hue raahī se ḳhizar-e-rah-e-manzil tak

tanhā.ī kī ye kaun sī manzil hai rafīqo
tā-hadd-e-nazar ek bayābān sā kyuuñ hai

ġham kī baḌhtī huī yūrish se na ghabrā 'āmir'
ġham bhī ik manzil-e-rāhat kā nishāñ hotā hai

sañg-e-manzil ne lahū uglā hai
duur ham bādiya-paimāoñ se duur

ye nahīñ hai ki palaT aatā huuñ maiñ manzil se
sar-e-dīvār koī dar nahīñ hotā yaksar

na.ī manzil na.ī sūrat nayā manzar mirī fitrat
badaltā huuñ maiñ roz-o-shab Thikāna bhī nayā dekhūñ