Tags-Manzil

phir vahī johd-e-musalsal phir vahī fikr-e-ma.āsh
manzil-e-jānāñ se koī kāmyāb aayā to kyā

bhaTakte rahte yūñhī aur na paate umr-bhar manzil
baḌā ehsāñ kiyā tum ne sharīk-e-kārvāñ kar ke

kisī manzil kī taraf koī qadam uTh na sakā
apne hī paañv kī zanjīr the jaane vaale

merī taqdīr meñ manzil nahīñ hai
ġhubār-e-kārvāñ hai aur maiñ huuñ

ġham sañvarte rahe ham sambhalte rahe shauq manzil ke sheve badalte rahe
the jo nazdīk ham se vo ab duur haiñ the jo nā-āshnā āshnā ho ga.e

har manzil-e-hayāt se guzrā chalā gayā
har marhale pe aap the merī nigāh meñ

ishq tanhā hai sar-e-manzil-e-ġham
kaun ye bojh uThāne aa.e

añdheroñ meñ bhaTaktī hai javānī raushnī kaisī
ye kyā manzil hai mahrūm-e-tamannā ho ga.e ham tum

us kī galiyoñ meñ rahe gard-e-safar kī sūrat
sañg-e-manzil na bane raah kā patthar na hue

sañg-e-manzil ye chheḌtā hai mujhe
aa tujhe merī justujū thī bahut

mohabbat aap hī manzil hai apnī
na jaane husn kyuuñ itrā rahā hai

ḳhayāl-e-sūd-o-ziyāñ aur husūl-e-manzil-e-ishq
zavāl-e-umr meñ jaise koī shabāb ke saath

sab haiñ manzil kī justujū meñ yahāñ
kaun dekhe burā bhalā rasta

musāfiro abhī manzil ke haiñ paḌāv bahut
isī hisāb se zād-e-safar bhī rakhnā hai

tirī koshish ham ai dil sa.i-e-lā-hāsil samajhte haiñ
sar-e-manzil tujhe begāna-e-manzil samajhte haiñ

zamāna manzil-e-gum-gashta kī talāsh meñ hai
ye baat uḌtī huī gard-e-kārvāñ se sunī

tavāf-e-manzil-e-jānāñ hameñ bhī karnā hai
'farāz' tum bhī agar thoḌī duur saath chalo

merī sochoñ meñ jo manzil thī merī apnī thī
mere qadmoñ meñ jo rasta thā mirā apnā thā

'jauhar' ye ġham-e-rāh ye dushvārī-e-manzil
kahtā hai mirā dil ki qayāmat kā safar hai

gum-gashta-e-manzil huuñ mohabbat meñ kuchh aisā
bikhrā huā shīrāza-e-taskīn-e-nazar hai