Tags-Manzil

ba-zāhir kyā hai jo hāsil nahīñ hai
magar ye to mirī manzil nahīñ hai

māyūs 'mujīb' itnā bhī na ho laġhzish to gunāh-e-ādam hai
manzil kī talab to mohkam hai idrāk-e-safar mohkam na sahī

haañ yaad hameñ bhī kar lenā āsā.ish-e-manzil se pahle
ai qāfile vaalo ġham na karo ai manzil-e-jānāñ ham na sahī

umr bhar chal ke bhī paa.ī nahīñ manzil ham ne
kuchh samajh meñ nahīñ aatā ye safar kaisā hai

qasam fareb-e-nigāh-o-dil kī hameñ to us justujū ne khoyā
vahīñ thī dar-asl apnī manzil qadam uThe the jahāñ se pahle

shauq-e-ḳharāsh-e-ḳhār mire dil meñ rah gayā
pā-e-talāsh pahlī hī manzil meñ rah gayā

rāh-e-talab meñ chalte phirte lākhoñ aate jaate haiñ
ḳhalq meñ hai ushshāq kī manzil ka.aba bhī but-ḳhāna bhī

haqīqat meñ nigāhoñ se koī manzil nahīñ bachtī
guzarte dekhe haiñ gosha-nashīñ tak shāh-rāhoñ se

dil-e-rah-rav meñ haiñ kuchh aur ḳhatre
ḳhayāl-e-dūrī-e-manzil nahīñ hai

mohabbat jaada hai manzil nahīñ hai
ye mushkil āḳhirī mushkil nahīñ hai

sab ko pahuñchā ke un kī manzil par
aap raste meñ rah gayā huuñ maiñ

qais kā tujh meñ junūñ jazba-e-mansūr nahīñ
varna manzil-gah-e-dildār to kuchh duur nahīñ

ishq meñ manzil ārām bhī thī
ham sar-e-kūcha-e-vahshat Thahre

samt-e-manzil kā ta.ayyun nahīñ do gaam kī baat
kitne moḌ aa.e haiñ jab tarz-e-safar badlā hai

nairañgī-e-siyāsat-e-daurāñ to dekhiye
manzil unheñ milī jo sharīk-e-safar na the

āshiqī rahbar se sīkho sar karo manzil ba-ḳhair
us kā hai ye rāsta achchhī tarah dekhā huā

sadiyoñ sadiyoñ merā safar
manzil manzil rāhguzar

maiñ aisā jāda-e-manzil guzishta huuñ jis ke
har ek sañg meñ zaḳhm-e-safar hai chāragaro

ye to ho saktā hai ki donoñ kī manzil ek ho
phir bhī us ke ham-safar hone kī farmā.ish na kar

duur manzil hai havā.eñ bhī muḳhālif sī haiñ
do ghaḌī baiTho to ārām se bāteñ hoñgī