Tags-Manzil

tū mard-e-momin hai apnī manzil ko āsmānoñ pe dekh nādāñ
ki rāh-e-zulmat meñ saath degā koī charāġh-e-alīl kab tak

dil-e-raushan hai raushan-gar kī manzil
ye ā.īna sikandar kā makāñ hai

manzil hai to ik rasta-e-dushvār meñ gum hai
rasta hai to pech-o-ḳham-e-dildār meñ gum hai

rāh-e-ulfat meñ jise gum-gashtagī hāsil huī
aise ḳhush-taqdīr ko āsūda-e-manzil samajh

har manzil-e-hayāt pe un ko kiyā talāsh
har raah meñ ham un ko pukāre chale ga.e

nahīñ ab koī ḳhvāb aisā tirī sūrat jo dikhlā.e
bichhaḌ kar tujh se kis manzil par ham tanhā chale aa.e

merī nafī ko rāsta kar
manzil saaf inkār mirī

usī ke hisse meñ aatī hai manzil-e-maqsūd
jo har qadam pe yahāñ imtihān detā hai

na rahbar hai na jaada hai na manzil
nigāhoñ meñ ġhubār-e-kārvāñ hai

tire naqsh-e-qadam par chal rahā huuñ
ḳhudā jaane mirī manzil kahāñ hai

benām-o-nishāñ barg sī āvāra-e-manzil
kuchh mujh pe karam shāḳh kā kuchh zor havā kā

manzil pe pahuñch sakte nahīñ aise musāfir
har gaam pe ho ḳhauf jinheñ ābla-pā kā

maiñ jis ko manzil-e-maqsūd kā rahbar samajhtā thā
usī be-dard ne mujh ko nigahbāñ ban ke lauTā hai

faisla dil kā mohabbat meñ hai rahbar apnā
fikr kiyā manzil-e-jānāñ agar anjānī hai

rah-navardān-e-vafā manzil pe pahuñche is tarah
raah meñ har naqsh-e-pā merā banātā thā charāġh

nahīñ miltī unheñ manzil jinheñ ḳhauf-e-havādis hai
jo maujoñ se nahīñ Darte nadī ko paar karte haiñ

manzil ke nishāñ mar ke bhī vo pā na sakeñge
jo log rah-e-dār-o-rasan bhuul ga.e haiñ

baḌī hairān-kun hai
haqīqat ḳhvāb hai yā ḳhvāb se aage kī manzil

bahut thakān badan meñ mire safar kī rahī
magar vo shauq kī manzil ki har nagar kī rahī

maiñ kyuuñ kisī se sar-e-rāh rahbarī māñgūñ?
na.ī hai manzil-e-ġham ik yahī javāb sā hai!