Tags-Manzil

na.ī manzil ke mīr-e-kārvāñ bhī aur hote haiñ
purāne ḳhizr-e-rah badle vo tarz-e-rahbarī badlā

do aalam se guzar ke bhī dil-e-āshiq hai āvāra
abhī tak ye musāfir apnī manzil par nahīñ aayā

maiñ jo kahtā thā so ai rahbar-e-kotāh-ḳhirām
terī manzil bhī mirī gard-e-safar hai ki nahīñ

ai ye fasūn-e-dilbarī tāza-ruḳh-o-siyāh-chashm
manzil-e-qurb bhī ga.ī tujh se na fāsle ga.e

ḳhud apne aap se aisā bichhaḌ gayā huuñ 'nasīm'
ki ab maqām bhī manzil bhī justujū bhī maiñ

na kar sakā kisī manzil kā ehtirām ki maiñ
junūn-e-shauq kā maarā safar kī qaid meñ thā

hamārī intihā-e-nā-tavānī hadd-e-manzil hai
salāmat larzish-e-pā kaun le ehsān rahbar ke

zuleḳhā ke vaqār-e-ishq ko sahrā se kyā nisbat
jo ḳhud khīñch kar na aa jaa.e use manzil nahīñ kahte

har qadam par thī us kī manzil lek
sar se saudā-e-justajū na gayā

kis tanz se vo farmāte haiñ kyā sahl hai ulfat kī manzil
yaañ jaan gañvānī paḌtī hai yaañ ashk bahānā paḌtā hai

ajiib bhūl-bhulayyāñ hai manzil-e-hastī
bhaTaktā-phirtā hai gum-gashta kārvāñ apnā

jaras ne muzhda-e-manzil sunā ke chauñkāyā
nikal chalā thā dabe paañv kārvāñ apnā

maiñ saath detā huuñ yāroñ kā hadd-e-manzil tak
maiñ jāntā nahīñ dastūr-e-rah-ravī kyā hai

manzil to mere sāmne aatī rahī 'obaid'
josh-e-junūñ ne mujh ko Thaharne nahīñ diyā

manzil kahāñ tākte haiñ raahī
takte haiñ paḌāv kis taraf hai

ik manzil-e-be-maqsad o be-nām kī ḳhvāhish
kāñToñ kī savārī pe safar le ke ga.ī hai

us ko hañgāma-e-manzil kī ḳhabar kyā doge
jis ne paayā ho sar-e-rāhguzar sannāTā

haañ manzil-e-ummīd bhī nazdīk thī lekin
ġham-ḳhāna-e-jānānāñ bahalne nahīñ detā

koī manzil nahīñ miltī to Thahar jaate haiñ
ashk āñkhoñ meñ musāfir kī tarah aate haiñ