Tags-Manzil

magar ye zindagī to be-karāñ hai
nigāh-e-shauq kī manzil kahāñ hai

kārvāñ manzil-e-maqsūd pe pahuñchā 'nayyar'
maiñ ki phirtā huuñ abhī dasht meñ vīrāne meñ

zindagī kī bhī yaqīnan koī manzil hogī
ye safar hī kī tarah ek safar hai ki nahīñ

manzil kī musāfiro na pūchho
mil jaa.e jise jahāñ Thahar jaa.e

jo rāheñ ḳhud meñ hī be-manzil sī hoñ
aisī rāheñ nākāmī hī detī haiñ

manzil mire qarīb se ho kar guzar ga.ī
aur maiñ talāsh-e-jāda-e-manzil meñ rah gayā

mujh se ye pūchhtī haiñ mirī hichkiyāñ 'figār'
ab kitnā fāsla tirī manzil meñ rah gayā

manzil fanā-e-zauq-e-talab kā maqām thī
achchhā huā maiñ sarhad-e-manzil meñ rah gayā

hai nau-javānī meñ zo.af-e-pīrī badan meñ ra.asha kamar meñ ḳham hai
zamīñ pe saaya hai apne qad kā ki jāda-e-manzil-e-adam hai

ab justujū-e-dost kī manzil kahīñ bhī ho
ham chal paḌe haiñ raah ko dushvār dekh kar

rāsta jo bhī iḳhtiyār karo
apnī manzil ko aa.ina rakhnā

mil hī jaatī kabhī koī manzil mujhe
ik qadam lauT kar maiñ ne dekhā nahīñ

pata nahīñ hai 'rishī' duur duur manzil kā
kidhar ko jaa.eñ hameñ raat ho ga.ī ban meñ

ba-īñ be-dast-o-pā.ī mil bhī jā.egā to kyā hogā
abas hai fikr-e-manzil meñ talāsh-e-kārvāñ karnā

manzil samajh ke daar pe maiñ to na ruk sakā
ḳhud mujh se merī zindagī kahtī rahī ki bas

milegī manzil-e-'maqsūd' ik din
abhī shādāb ḳhvāhish kā shajar hai

kyā hogā is se baḌh ke koī rabt-e-bāhamī
manzil hamārī vo to ham un kā patā hue

tarīq-e-ishq pe hañstī to hai ḳhirad lekin
ye gumrahī kahīñ manzil se ham-kanār na ho

safar-e-manzil-e-shab yaad nahīñ
log ruḳhsat hue kab yaad nahīñ

mil hī jā.egī kabhī manzil-e-maqsūd-e-sahar
shart ye hai ki safar karte raho shaam ke saath