Tags-Manzil

yahī andāz haiñ to ġham nahīñ kuchh buad-e-manzil kā
umañgeñ jaag uThī haiñ zindagī sī kārvāñ meñ hai

raushnī sī kabhī kabhī dil meñ
manzil-e-be-nishāñ se aatī hai

ye nā-umīdī kī intihā hai ki āgahī kī hai koī manzil
ye dil ko kyā āriza huā hai ise kisī se gila nahīñ hai

na jāneñ is safar kī manzil-e-avval kahāñ hogī
fanā kī āḳhirī manzil pe hai pahlā qadam merā

kahā jhuñjhlā ke ahl-e-qāfila se ek rahbar ne
abhī to pahlī manzil hai abhī se kyuuñ lage Darne

har jagah hāzir huuñ maiñ apne misālī tan ke saath
fāsle aur vaqt be-ma.anī haiñ manzil kī taraf

hai shauq-e-safar aisā ik umr se yāroñ ne
manzil bhī nahīñ paa.ī rasta bhī nahīñ badlā

na koī manzil-e-maqsūd hai na rāh-e-talab
bhaTakte rahne kī aadat liye phire hai mujhe

raah ke sab dukh jhel ke jab
manzil aa.e to manzil dukh

ham-rāhiyoñ ko jashn manāne se thī ġharaz
manzil hanūz duur thī rasta kuchh aur thā

apne markaz se sitāroñ par jo kartā huuñ nazar
jis ko jis manzil meñ chhoḌā thā usī manzil meñ hai

ab koī shāyān-e-jalva hai na shāyān-e-kalām
tū usī manzil meñ behtar hai ki jis manzil meñ hai

jab ba-juz mahbūb ho jaatī hai ojhal kā.enāt
ik maqām aisā bhī jazb-e-shauq kī manzil meñ hai

gar aarzū hai tujh ko mile manzil-e-hayāt
is aarzū meñ ḳhud ko to mahv-e-safar bhī rakh

paañv uThte the usī manzil-e-vahshat kī taraf
raah takte the jahāñ raah ke patthar kyā kyā

tere irfān kī ye kaun sī manzil hai ḳhudā
phir na.e ḳhākoñ kā mehvar huiiñ āñkheñ merī

jo tanhā paas manzil dil ko shāyāñ hai mohabbat meñ
to āñkhoñ ko hai lāzim dīda-e-hasrat-nagar honā

koī maqsad na koī manzil ho
zindagī kyā mamāt hai pyāre

vo junūñ-ḳhez masāfat thī ki dekhā hī nahīñ
umr bhar paañv se lipTī rahī manzil mere