Tags-Masti

ham se khul jaao ba-vaqt-e-mai-parastī ek din
varna ham chheḌeñge rakh kar uzr-e-mastī ek din

ahl-e-junūñ ko fāqa-mastī ahl-e-ḳhirad ko ishrat-e-hastī
dekh ke ye tauqīr-e-insāñ aql hai hairāñ apne vatan meñ

vahāñ haiñ ham jahāñ 'bedam' na vīrāna na bastī hai
na pābandī na āzādī na hushyārī na mastī hai

kahīñ hai abd kī dhun aur kahīñ shor-e-anal-haq hai
kahīñ iḳhfā-e-mastī hai kahīñ iz.hār-e-mastī hai

har ik zarre meñ hai innī-anallāh kī sadā saaqī
ajab mai-kash the jin kī ḳhaak meñ bhī josh-e-mastī hai

'shād' na vo dīdār-parastī aur na vo be-nashsha kī mastī
tujh ko kahāñ se DhūñDh ke laa.eñ uf rī javānī haa.e zamāne

aage aage koī bagūlā sā
ālam-e-mastī-o-tarab meñ chalā

ashnān nigāheñ kartī thiiñ parkāsh kī chaḌhtī naddī meñ
ākāsh ke ubhre taare the Duube hue kaif-o-mastī meñ

Thokareñ khā ke bhī shā.ista-mizājī na ga.ī
fāqa-mastī meñ bhī ham sāhib-e-dastār rahe

nigāh-e-ishq o mastī meñ vahī avval vahī āḳhir
vahī qur.āñ vahī furqāñ vahī yāsīñ vahī taahā

na kar taqlīd ai jibrīl mere jazb-o-mastī kī
tan-āsāñ arshiyoñ ko zikr o tasbīh o tavāf aulā

kahne sunñe kā nahīñ ye vaqt jā vaa.iz kahīñ
ālam-e-mastī meñ apnī guftugū kuchh aur hai

gum ho gayā mastī meñ taḌapne kā maza bhī
kyā chiiz 'qatīl' aaj pilā dī ga.ī mujh ko

dalīl-e-ḳhvāb-e-mastī hai tirī āmādgī imshab
magar is shab meñ tujh se aur koī kaam rakhtā huuñ

fasl aa.ī hai ye kaisī kis josh pe hai mastī
bū dete haiñ gul mai kī ham itr jo malte haiñ

kaif-o-mastī surūr kyā ma.anī
zindagī meñ bhī ab ḳhushī kam hai

jab ki is kā bhī hai ma.aal yahī
mai-parastī bhī fāqa-mastī hai

mai-o-mastī nahīñ hai us pe harām
mai-kade meñ jo hosh-mand rahe

gulābī āñkhoñ meñ aise bhañvar the mastī ke
sharāb Duub ke un meñ bahut halāl lagī

vo vaqt-e-shabāb vo zamāna na rahā
vo nashsha mastī vo tarāna na rahā