Tags-Masti

aaj apnī mahfil meñ hai balā kā sannāTā
dard hai na taskīñ hai hosh hai na mastī hai

zahr-e-chashm-e-sāqī meñ kuchh ajiib mastī hai
ġharq kufr o īmāñ haiñ daur-e-mai-parastī hai

bhikshū-dānī, pyāsā pānī, dariyā sāgar, jal gāgar
gulshan ḳhushbū, koyal kūkū, mastī dārū, maiñ aur tū

saaqī ke haath se mastī meñ jab koī sāġhar chhūT gayā
mai-ḳhāne meñ ye mahsūs huā har mai-kash kā dil TuuT gayā

na aurāk-e-hastī na ehsās-e-mastī
jidhar chal paḌā huuñ chalā jā rahā huuñ

chashm par nashsha-e-sāqī jo rahī aks-fagan
chuur mastī se har ik sāġhar-e-sarshār rahā

kaif-e-mastī meñ ajab jalva-e-yaktā.ī thā
tū hī tū thā na tamāshā na tamāshā.ī thā

mast umañgoñ ke jhoñke aur faaqa mastī kā aalam
hasrat kī tez havā.eñ bhī ummīd kī ātish-bārī bhī

jahāñ pe chhāyā sahāb-e-mastī baras rahī hai sharāb-e-mastī
ġhazab hai rañg-e-shabāb-e-mastī ki rind o zāhid bahak rahe haiñ

ain mastī meñ jo vo shoḳh huā sar ki jabīñ
ye uḌe hosh ki nashshe ne hiran dikhlāyā

vaa.e is jiine par ai mastī ki daur-e-charḳh meñ
jām-e-mai par gardish aave aur mai-ḳhāna ḳharāb

josh-e-mastī meñ chale aa.e kahāñ tum 'rāqim'
ye to masjid hai chalo ḳhāna-e-ḳhummār nahīñ

agar terī ḳhushī hai tere bandoñ kī masarrat meñ
to ai mere ḳhudā terī ḳhushī se kuchh nahīñ hotā

bhuuk aur pyaas zaat kī lazzat
fāqa-mastī qanā.atoñ kā mazā

ham jo mastī meñ girte paḌte haiñ
zāhid aisī namāz kyā jaane

pī ga.e ḳhum ke ḳhum na kī mastī
yaañ sharāb-e-farañg kyā hai ab

jo mastī hai mirā maqsūm 'sahbā'
use sāġhar-ba-sāġhar likh rahā huuñ

ab kahāñ 'nātiq' ye bad-mastī kahāñ
al-firāq ai bazm-e-rindāñ alvidā.a

kaif-o-mastī jo tirī āñkhoñ ke ḳhum-ḳhāne meñ hai
vo tirī miinā meñ hai saaqī na paimāne meñ hai

kis mastī meñ ab rahtā huuñ
ḳhud ko ḳhud meñ DhūñD rahā huuñ