Tags-Masti

haa.e mastī meñ nahīñ rahtā zabāñ par iḳhtiyār
bātoñ bātoñ meñ na kahne kī bhī kah jaatā huuñ maiñ

mastī se darhamī hai mirī guftugū ke biich
jo chāho tum bhī mujh ko kaho maiñ nashe meñ huuñ

na rañg-o-naġhma na jām-o-mīnā na raqs-o-mastī
bagūle sab ko nigal rahe haiñ

phir huī yād-e-mai-kashī taaza
masti-e-abr-e-nau-bahār na pūchh

mai-o-sāqī haiñ sab yakjā ahāhāhā ahāhāhā
ajab aalam hai mastī kā ahāhāhā ahāhāhā

āñkhoñ se mastī na laboñ se amrit Tapkegā
shīsha-o-jām sharāboñ se ḳhālī ho jā.eñge

ab tirā pyaar satā.egā to merī hastī
tirī mastī bharī āvāz meñ Dhal jā.egī

maiñ ne mastī meñ ye pūchhā thā ki hastī kyā hai
raftgān-e-mai-o-mashrab se bahut din pahle

dikhāo mai-kasho ab zor-e-mastī
kiyā zāhid ne mai-ḳhāne kā dar band

mujh ko ḳhush aa.ī hai mastī shaiḳh jī ko farbahī
maiñ huuñ piine ke liye aur vo haiñ khāne ke liye

ye sub.h-o-shām kī mastī ye nashsha-e-shab-o-roz
tire baġhair koī kaif ho mujhe sam hai

is mahfil-e-kaif-o-mastī meñ is anjuman-e-irfānī meñ
sab jām-ba-kaf baiThe hī rahe ham pī bhī ga.e chhalkā bhī ga.e

sab kuchh maiñ luTā detā lekin kyā kahiye ki un kī nazroñ meñ
hushyārī kī talqīn bhī hai sar-mastī kā paiġhām bhī hai

vahī mai-nosh rāz-e-bāda-e-ulfat samajhte haiñ
jo mastī ko rahīn-e-jām-o-paimāna nahīñ kahte

har taraf saaqī tirā faiz-e-nazar paatā huuñ maiñ
ḳhānqāhoñ meñ bhī mastī kā asar paatā huuñ maiñ

dopahar raat aa chukī hīla-bahāna ho chukā
aur mastī mil chuke gesū meñ shāna ho chukā

mohabbat zindagī hai zindagī kā naam mastī hai
agar mastī na ho to zindagī miTTī se sastī hai

zalzale kā thā safar jis meñ kī mastī ham ne
ḳhushk chaTTānoñ pe dauḌā dī hai kashtī ham ne