Tags-Mausam

bāñdhī thiiñ āshā.eñ kyā kyā ham ne ab ke mausam se
'rahmānī' ab kaun sī rut meñ phūle bahīrā kyā ma.alūm

garm aañsū aur ThanDī aaheñ man meñ kyā kyā mausam haiñ
is bagiyā ke bhed na kholo sair karo ḳhāmosh raho

chal ke gulshan meñ dekh le kaisā
mausam-e-gul ne ehtimām kiyā

mausam to har ik shāḳh ke khulne kā 'zafar' thā
phir un pe koī barg-o-samar kyuuñ nahīñ aayā

ye batā hijr ke mausam kā mudāvā kyā hai
mujh ko andāz mohabbat ke sikhāne vaale

taḌap ke jaan nikal jā.egī abhī sayyād
na kahiyo baaġh meñ phir mausam-e-bahār aayā

na burūdat thī na hiddat thī ajab mausam thā
choT khāyā kiye ham apnī hī kaj-bīnī se

phir tirī yaad ke mausam ne jagā.e mahshar
phir mire dil meñ uThā shor havāoñ jaisā

kyā jāniye ab ke mausam meñ kab vaqt ke jī meñ kyā aa.e
kis kī auqāt bigāḌe hai kis kī auqāt banā.e hai

isī mausam kī tamannā thī ka.ī barsoñ se
bādbāñ kholne the aur girā baiThā huuñ

vo jab aa.egā to phir us kī rifāqat ke liye
mausam-e-gul mire āñgan meñ Thahar jā.egā

barsāt kā to mausam kab kā nikal gayā par
mizhgāñ kī ye ghaTā.eñ ab tak barsatiyāñ haiñ

tujh se kyā bichhḌā mirī saarī haqīqat khul ga.ī
ab koī mausam mile to mujh se sharmātā nahīñ

us ke taġhāful kā bhī bharam rakh us se itnī chheḌ na kar
'ramz' barastī hai be-mausam koī ghaTā bhī kitnī der

ab ke vasl kā mausam yūñhī bechainī meñ biit gayā
us ke hoñToñ par chāhat kā phuul khilā bhī kitnī der

tanhā.ī-pasandī mirī fitrat kā bhī juz thā
mausam bhī ye kahtā hai nikalnā nahīñ ghar se

patthar na banā de mujhe mausam kī ye saḳhtī
mar jaa.eñ mire ḳhvāb na ta.abīr ke Dar se

hameñ tanhā.ī ke mausam kī aadat paḌ chukī hai
ki is mausam meñ ab to kitnī rāteñ kaT chukī haiñ

abr kā TukḌā koī bālā-e-bām aatā huā
mere ghar bhī sabz mausam kā payām aatā huā

farār un se hai mushkil vo dastaras meñ nahīñ
ye zard zard se mausam vo din gulābī se