Tags-Mausam

hijr meñ mausam-e-hujūm-e-gul
aur dīvāna ban gayā huuñ maiñ

dard ho laakh yā siine se lahū ristā ho
shabnamī aañkh kā mausam nahīñ karne vaale

kyā koī biit chuke ġham ke badalte mausam
sānehe jo na hue vo bhī huā chāhte haiñ

ajab mausam meñ kaTtī thī javānī
chaman thā aur lutf-e-qissa-ḳhvāñ the

ik karb kā mausam hai jo daa.im hai abhī tak
ik hijr kā qissa ki mukammal nahīñ hotā

tum habs ke mausam ko zarā aur baḌhā lo
be-samt na ho jaa.eñ parindoñ kī uḌāneñ

zamīñ kī āḳhirī had par pahuñch ke sochtā huuñ
yahāñ se mausam-e-dīvār-o-dar kahāñ tak hai

har din us kā har shab us kī har mausam us kā
kis ne tane ā.ankhoñ par jaale ye ham kyā jāneñ

to e'tibār-e-shab-e-intizār hai jānāñ
tire firāq ke mausam mirī nazar meñ haiñ

ghuT ke rah saktī thī kab tak ātish-e-rañg-e-bahār
zarb-e-mausam bhī kuchh aisī thī ki sab gulshan jalā

tamām mausam-e-bārish isī tarah guzrā
chhateñ Tapaktī rahīñ aur makīñ sisakte rahe

ḳhuun ke chhīñToñ se kuchh phūloñ ke ḳhāke hī sahī
mausam-e-gul aa gayā zindāñ meñ baiThe kyā kareñ

jaane kyā ho gayā hai mausam ko
sabz koī shajar nahīñ miltā

vo saath mere thā jaise har pal vo dekhtā thā mujhe musalsal
zarā sā mausam badal gayā to churā ke mujh se nazar gayā vo

barastā bhīgtā mausam dhuāñ dhuāñ hogā
pighaltī sham.a pe chehra koī gumāñ hogā

mohtaram pī lījiye mausam ne mauqa.a de diyā
dekhiye kaalī ghaTā ne uTh ke pardā kar diyā

baiThe baiThe pheñk diyā hai ātish-dān meñ kyā kyā kuchh
mausam itnā sard nahīñ thā jitnī aag jalā lī hai

mujhe satā.egā tanhā.iyoñ kā mausam kyā
hai mere saath mirā ḳhāndān pinjre meñ

kar ga.e be-mehr mausam ke supurd
rafta rafta aaj marte sabz peḌ

agar ye chāho ki ziist guzre hañsī ḳhushī kī phuvār meñ hī
bahut zarūrī hai ai 'zafar' ye tirā bhī mausam-shanās rahnā