Tags-Mausam

ye mausam rim-jhim kā mausam ye barkhā ye mast fazā
aise meñ aao to jāneñ aise meñ kab aate ho

ham rahe bhī to badalte hue mausam kī tarah
terī āñkhoñ meñ koī aks na Thahrā apnā

kitne hañste hue mausam abhī aate lekin
ek hī dhuup ne kumhlā diyā manzar merā

hañso to rañg huuñ chehre kā rovo to chashm-e-nam meñ huuñ
tum mujh ko mahsūs karo to har mausam meñ huuñ

daur-e-falak jab dohrātā hai mausam-e-gul kī rātoñ ko
kunj-e-qafas meñ sun lete haiñ bhūlī-bisrī bātoñ ko

kuchh dhuul hai bikhrī yādoñ kī
kuchh gard-ālūd se mausam haiñ

ab umr na mausam na vo raste ki vo palTe
is dil kī magar ḳhām-ḳhayālī nahīñ jaatī

mohabbat ek jaisī hai vafā.eñ ek jaisī haiñ
yahāñ mausam badalne par havā.eñ ek jaisī haiñ

mausam-e-gul meñ tirā ham se judā ho jaanā
yaad aa.e to hameñ ḳhuun rulā.e kyā kyā

ummīd o yaas kī rut aatī jaatī rahtī hai
magar yaqīn kā mausam nahīñ badaltā hai

log kahte the vo mausam hī nahīñ aane kā
ab ke dekhā to nayā rañg hai vīrāne kā

ga.e din samajhne parakhne ke 'sāz'
ye mausam to bas maan jaane kā hai

harīf-e-koshish-e-parvāz hai ye mausam-e-barf
maiñ āshiyāñ meñ hī par khol khol rah jā.ūñ

kaisā mausam hai ki chubhtī haiñ badan meñ kirneñ
sar pe sūraj kisī ḳhanjar kī tarah lagtā hai

na āñganoñ meñ daraḳht-e-jāñ par visāl-mausam kā bor jaagā
na Daalī Daalī kisī parinde ne ḳhushbuoñ ke tarāne chheḌe

samāñ ho ḳhushī kā yā ġham kā ho mausam
ham apnā fasāna sunāte raheñge

hasīn tabsira mausam pe jab tamām huā
to us ne kaan meñ chupke se kuchh mazīd kahā

bahār-e-lāla-o-gul se ḳhizāñ kī aahaT tak
har ek vāqi.a mausam ne chashm-dīd kahā

qafas ke ba.ad chaman meñ ye dekhnā hai mujhe
ḳhizāñ mile ki vahāñ mausam-e-bahār mile

abhī do chaar hī būñdeñ girīñ haiñ
magar mausam nashīlā ho gayā hai