Tags-Mausam

koī mausam ho mirī chhap mirā rañg apnā hai
merī ye vaz.a ki be-vaz.a haiñ manzar mere

mausam aur ye log mujhe kuchh mohlat deñ
paude peḌ baneñge koshish kartā huuñ

ye zinda rahne kā mausam guzar na jaa.e kahīñ
ab aa bhī jaao dil-e-zār mar na jaa.e kahīñ

sāhiloñ kī duurī se sāvanoñ ke mausam meñ kaise Duub sakte the
be-qarār mausam meñ bādbāñ to maiñ bhī huuñ bādbāñ to tum bhī ho

faqat ek lamhe meñ munkashif huī sham-e-mausam-e-ārzū
'sahar' us ke chehre kī samt jab gul-e-āftāb nahīñ rahā

tumhāre ḳhat kabhī paḌhnā kabhī tartīb se rakhnā
ajab mashġhūliyat rahtī hai bekārī ke mausam meñ

hazār baar mirā dard muskurā.egā
hazār baar agar mausam-e-bahār aayā

kis ne samjhā hai badalte hue mausam kā mizāj
dhuup rahte hue barsāt bhī ho saktī hai

ab ke mausam kī havāoñ meñ baḌī vahshat hai
zard pattoñ kī tarah TuuT na jaa.eñ ham bhī

bāġhbāñ kī ik zarā sī laġhzish-e-tartīb se
mausam-e-gul thā magar gulshan meñ ra.anā.ī na thī

ik rañg hī is ziist ko kaafī hai 'sachin' bas
mausam kī tarah rañg badalte bhī nahīñ haiñ

is mausam meñ kaun kahāñ tak diyā jalā.e rakkhe
havā chale to Daal se TuuTe paat samundar biich

kyā tez hai ye mausam-e-bārān-e-suḳhan bhī
labrezī-e-dil kuchh hai navā-ḳhezī-e-lab kuchh

thā maiñ āḳhir usī mausam kī fazā meñ pahle
is qadar soz na thā merī navā meñ pahle

idhar mausam kī ye ḳhush-e-ehtimāmī
udhar rindoñ kī ye hasrat-bajāmī

yuuñ chaar din kī bahāroñ ke qarz utāre ga.e
tumhāre ba.ad ke mausam faqat guzāre ga.e

mausam tumhāre saath kā jaane kidhar gayā
tum aa.e aur bor na aayā daraḳht par

ham pe kyā hogā zamāne kī havāoñ kā asar
aap mausam kī tarah roz badalte rahiye

bahāreñ jis kī shāḳhoñ se gavāhī māñgtī thiiñ
vahī mausam hameñ ab be-samar kyuuñ lag rahā hai

mausam-e-sañg-o-rañg se rabt-e-sharār kis ko thā
lahza-ba-lahza jal ga.ī dard-e-bahār kis ko thā