Tags-Mausam

ye mirā ehsās hai yā jabr-e-mausam kā asar
ab kī rut mahke nahīñ gul pichhle sāloñ kī tarah

duur junūñ meñ yaas kā aalam hashr se pahle hashr kā manzar
taptā mausam sard havā.eñ uf rī javānī haa.e zamāne

us roz mausam-e-ḳhizāñ kī pahlī bārish huī
jab us ne mere dar se āḳhirī baar qadam nikālā

aaj ke shahzāde sab kuchh chāhte haiñ is tarah
saḳhtī-e-mausam bhī kam ho raah bhī mushkil na ho

saare achchhe mausam us kī ḳhvāhish meñ hī biit ga.e
kyā vo ab in zard rutoñ meñ mujh se milne aa.egā

fasl-e-gul hī to hai vo ham jis ko
mausam-e-jāma-darī kahte haiñ

pahuñchā hai tire mahr se qutbain kā mausam
din thā to nahīñ bhī thā ye shab hai bhī nahīñ bhī

mausam kā zulm sahte haiñ kis ḳhāmushī ke saath
tum pattharoñ se tarz-e-shakebā.ī maañg lo

ik ḳhamoshī hai liye hairat-e-sad-naqsh-o-nigār
varna badle hue mausam kī zabāñ kuchh bhī nahīñ

aaj hai vo bahār kā mausam
phuul toḌūñ to haath jaam aa.e

kabhī dahaktī kabhī mahaktī kabhī machaltī aa.ī dhuup
har mausam meñ āñgan āñgan ruup badal kar chhā.ī dhuup

ḳhizāñ milī abhī tak kahīñ bahār mile
safar meñ pyaar kā mausam to bā-vaqār mile

jabr mausam ke haiñ jitne bhī shajar ke liye haiñ
un ko kyā is se jo betāb samar ke liye haiñ

ḳhudā-e-mausam-e-gul un ko tāzgī baḳhshe
jo dast-e-shauq se dast-e-sabā banāte haiñ

talāsh hai hameñ kuchh gum-shuda bahāroñ kī
guzar chuke haiñ jo mausam unheñ pukārte haiñ

bhūle hī se aa jaao mahkī huī rāteñ haiñ
barsāt kā mausam hai Dastī huī tanhā.ī

biit chukā hogā ye ḳhvāboñ kā mausam
band milegā niiñd kā darvāza ik din

uḌ gayā rañg ruḳh-e-mausam-e-gul kā kyā kyā
ḳhushk patte jo kabhī bād-e-sabā se khele

jis bādal ne sukh barsāyā jis kī chhāñv meñ priit milī
āñkheñ khol ke dekhā to vo sab mausam lamhātī the

phir se añgāroñ kā mausam mire andar utrā
phir baḌhā haath mirā la.al-o-gohar kī jānib