Tags-Mausam

mere haal pe hairat kaisī dard ke tanhā mausam meñ
patthar bhī ro paḌte haiñ insān to phir insān huā

fasl-e-ḳhizāñ to sah lī lekin mausam-e-gul meñ TuuT girī
bojh phaloñ kā sah nahīñ paa.ī shāḳh ki thī kamzor bahut

ek qatra jo laraztā hai mirī palkoñ par
zard mausam ko yahī qatra harā kar degā

ek mausam jo badaltā hai nazar ke pairahan
ek mausam muddatoñ se fikr pe Thahrā huā

mausam na sard garm na tūfāñ kā zor hai
ab ḳhud hī kuchh vabāl karūñ to ġhazal kahūñ

kabhī to abr ban kar jhuum kar niklo kahīñ barso
ki har mausam meñ ye sanjīdgī achchhī nahīñ lagtī

machaltī shoḳh maujoñ ko maiñ apne naam kyuuñ likkhūñ
ki āḳhir ḳhushk hogā mausam-e-barsāt kā dariyā

mausam-e-rañg bhī hai fasl-e-ḳhizāñ bhī taarī
dekhnā ḳhuun ke dhabbe haiñ ki hai gul-kārī

hamāre ġham kā paimāna hai ab to ausatan itnā
kabhī mausam bahāroñ kā ziyāda-tar nahīñ aayā

mausam-e-dard kī āñdhī meñ tirī yaad aa.ī
ham to hijrat meñ bhī manzar tujhe chamkā ke khule

mausam-e-ishq kī bārish meñ nahā.e itnā
ham kisī chashm-e-tasavvur meñ bhī murjhā ke khile

jahāñ pe kal tak thī chhāñv 'zākir' vahīñ pe Thahrī hai dhuup ab ke
ajab sitam hai kahīñ pe aa kar kahīñ ke mausam Thahar ga.e haiñ

vo saath jab tak rahe hamāre bahār apne shabāb par thī
vo kyā ga.e ki dil-o-nazar meñ udaas mausam Thahar ga.e haiñ

ab mire paas nahīñ koī bhī rone kā javāz
hijr mausam kī sahī ashk fishānī hotī

jeb apnī dekh kar mausam se yaarī kījiye
ab kī mahñgī hai bahut āb-o-havā barsāt kī

ghirte bādal meñ tanhā.ī kaisī lagtī hai
milan kā mausam aur judā.ī kaisī lagtī hai

dhund hī chhā.ī rahī āñkhoñ meñ tum se kyā kaheñ
ab to yaaro ek sā rahtā hai mausam sāl-bhar

ārizī mausam ko bhī ehsās-e-mahrūmī na ho
ghar ke sannāToñ ko ehsās-e-ziyāñ de dījiye

hijr kā mausam jhelī ho
aisī ek sahelī ho

sab rañg vahī Dhañg vahī naaz vahī the
is baar to mausam ke sab andāz vahī the