Tags-Mausam

vus.atoñ meñ dāman kī in dinoñ garebāñ hai
ham-nafas kahīñ shāyad mausam-e-bahārāñ hai

kis aahaT kī bahār se pag pag dhuul ke phuul khile
kis mausam ne Thokar khaa.ī ham majbūroñ se

tumhāre naam tumhāre nishāñ se be-sarokār
tumhārī yaad ke mausam guzarte jaate haiñ

har patjhaḌ ke baad hai mausam phūloñ kā
ḳhālī apne haath raheñge kitne din

buuñd girī thī jalte mausam ke hoñToñ par
aañkh meñ aañsū dil meñ sho.ala vāpas aayā

rañg ḳhushbū aur mausam kā bahānā ho gayā
apnī hī tasvīr meñ chehra purānā ho gayā

rabt-o-ta.alluqāt kā mausam nahīñ koī
bārish huī hai kaalī ghaTā ke baġhair bhī

terī ḳhātir mausam-e-gul meñ
kāñTe dil meñ chubho leñge

laboñ pe aa gayā dam apnā habs mausam meñ
havā-e-abar-e-bahārāñ yūñhī thamī na rahe

kaise be-rahm haiñ sayyād ilāhī tauba
mausam-e-gul meñ mujhe kaaT ke par rakhte haiñ

sar-gashta the mauj-e-havā se biit gayā vo mausam to ham
barg-e-ḳhizāñ kī mānind ab āvāra haiñ kohsāroñ par

mausam-e-zard meñ ek dil ko bachā.ūñ kaise
aisī rut meñ to ghane peḌ bhī jhaḌ jaate haiñ

vo zamāne kā taġhayyur ho ki mausam kā mizāj
be-zarar donoñ haiñ nairañgi-e-ādām ke sivā

is mausam kā kyā hai parsoñ
narsoñ ye bhī chal hī degā

ilzām apnī maut kā mausam pe kyuuñ dharūñ
mere badan meñ mere lahū kā fasād thā

jo kahtā hai ki dariyā dekh aayā
ġhalat mausam meñ sahrā dekh aayā

'maḳhmūr' ham bhī raqs kareñ mauj-e-gul ke saath
khul kar jo ham se mausam-e-dīvāna-gar mile

tujh se bichhaḌ kar tujh se mil kar donoñ mausam dekh liye
baat jahāñ thī ab bhī vahīñ hai farq zarā sā haal meñ hai

kaun mausam hai ki patthar se lahū ristā hai
ḳhūñ-bahā māñge hai ab dil kī sadā ham se bahut

din guzre
aur mausam badle