Tags-Mausam

mausam-e-zard meñ ik dil ko bachā.ūñ kaise
aisī rut meñ to ghane peḌ bhī jhaḌ jaate haiñ

yahāñ se un ke guzarne kā ek mausam hai
ye log rahte magar kaun se nagar meñ haiñ

vo mausam vo fazā vo sā.ateñ tere bichhaḌne kī
maiñ apne zehn meñ maazī ke pas-manzar na rakkhūñgā

tirī galī meñ ga.e kitne maah o saal hue
guzar ga.e ka.ī mausam hameñ bahāl hue

phir unhī zard peḌoñ ke nañge badan sho.ala-e-naḳhl se raakh hone lage
maiñ to samjhā thā mausam badalte hī phir Dāliyoñ par vo patte palaT ā.eñge

phailtī jā.egī chāroñ samt ik ḳhush-raunaqī
ek mausam mere andar se nikaltā jā.egā

aaj hameñ ye baat samajh meñ aa.ī hai
tum mausam ho aur mausam harjā.ī hai

aaj hameñ ye baat samajh meñ aa.ī hai
tum mausam ho aur mausam harjā.ī hai

hamāre bāloñ pe mausam hai barf-bārī kā
hamāre chehre pe uḌtī hai māh-o-sāl kī gard

firāq lamhoñ ko ham ne hasīñ banāyā hai
sajā ke dil meñ tire e.atibār kā mausam

hamāre pyaar ne umr-e-davām māñgī hai
hameñ qubūl nahīñ thā udhār kā mausam

jhukī hai aañkh ka.ī rat-jage sameTe hue
chhupā hai lams meñ kaisā ḳhumār kā mausam

dil-o-nigāh ke husn-o-qarār kā mausam
vo terī yaad tire intizār kā mausam

hamāre pyaar kī ye bhī adā nirālī hai
ḳhizāñ kī rut meñ manāyā bahār kā mausam

milī nigāh to ik pal meñ ham pe guzrā hai
karoḌ qurbatoñ lākhoñ qarār kā mausam

mausam-e-parvāz ne 'najmī' pukārā thā magar
par sameTe ham qafas kī tīliyāñ dekhā kiye

mire badan se phir aa.ī ga.e dinoñ kī mahak
agarche mausam-e-barg-o-samar chalā bhī gayā

vaqt guzrā hai pa mausam nahīñ badlā yaaro
aisī gardish hai zamīñ ḳhud bhī duhā.ī degī

ham badalte hī rahe ishq meñ mausam ke magar
ghar kī chaukhaT pe sadā gard purānī dekhī

tumhāre saath ye mausam farishtoñ jaisā hai
tumhāre ba.ad ye mausam bahut satā.egā