Tags-Mausam

paḌā TheThurtā bhī huuñ barf barf mausam meñ
usī zamāne meñ ātish-fishāñ bhī hotā huuñ

jame hue lab-o-ruḳhsār bhī dahak rahe the
hisār-e-mausam-e-barfāb meñ hasīñ thī aag

chamkī huī ho mausam-e-sarmā kī ik dopahar
ḳhush-sabz rāstoñ meñ koī ham-ḳhirām ho

mausam-e-yād kā koī jhoñkā, ab jo guzre tumhārī ḳhalvat se
soch lenā hamāre baare meñ, par hamārā malāl mat karnā

mausam-e-gul dekhiye khulte darīchoñ ke tale
bām-o-dar ko shahr kī āb-o-havā kah lījiye

ḳhumār-e-mausam-e-ḳhushbū had-e-chaman meñ khulā
mirī ġhazal kā ḳhazāna tire badan meñ khulā

kis hiddat se guzre kaise phuul hue
kyā mausam thā jab añgāre phuul hue

sardī aur garmī ke uzr nahīñ chalte
mausam dekh ke sāhab ishq nahīñ hotā

phuul kā khilnā bahut dushvār hai
mausam-e-gul āj-kal bīmār hai

guloñ ke chehroñ pe zardī sī phir rahī hai tamām
ga.ī bahār vo mausam kā ibtidā na rahā

ek us ke dam se har mausam huā rashk-e-bahār
ek shāḳh-e-ārzū ko be-samar us ne kiyā

chaman meñ aise bhī do chaar haiñ chaman vaale
ki jin ko mausam-e-gul nāgavār hotā hai

fusūñ ajiib ye ai mausam-e-bahār kiyā
ki ḳhār-zār ko ham-rañg-lāla-zār kiyā

idhar tum pyaas kī hurmat kā qissa chheḌ baiThe ho
udhar mausam ye kahtā hai ki dariyā dekhte rahiye

havā-e-mausam-e-ġham us ke shahr jaa.e to
mire dukhoñ kī koī baat us se kah denā

dard kī ek be-karāñ rut hai
habs mausam kā raaj har jānib

zard mausam to kahīñ saḳht qavā.ed jānāñ
naġhma kuchh aur nahīñ dil ko dukhāne vaalā

jab jab mausam jhūmā ham ne kapḌe phāḌe shor kiyā
har mausam shā.ista rahnā korī duniyā-dārī hai

hijr ke tapte mausam meñ bhī dil un se vābasta hai
ab tak yaad kā pattā pattā Daalī se paivasta hai

mahfil meñ tire hone se hai rañg pe mausam
ahvāl-e-ḳhās-o-ām tarab-ḳhez bahut hai