Tags-Mazhab

tumhāre ahd meñ ai kāfiro haa.e
kahāñ vo millat o maz.hab rahā hai

jaate haiñ kabhī dargāh shīvāle meñ bhī hai raah
maz.hab se nahīñ āgāh īmāñ kise kahte haiñ

suno hindū musalmāno ki faiz-e-ishq se 'hātim'
huā āzād qaid-e-maz.hab-o-mashrab se ab fāriġh

hai jin meñ bojh duniyā bhar kā maz.hab ke havāloñ se
mire bachchoñ ke kāñdhe par ye basta kis tarah kā hai

bas-ki hoñ millat-o-maz.hab se jahāñ ke āzād
ḳhanda taqrīr kare hai mirī be-dīnī par

aap ko shauq hai to maz.hab ham
ishq kā iḳhtiyār karte haiñ

nahīñ mālūm kyā vājib hai kyā farz
mire maz.hab meñ hai terī razā farz

us ko maz.hab kaho yā siyāsat kaho
ḳhud-kushī kā hunar tum sikhā to chale

tamannā hai ki chheḌūñ naġhma-e-insāniyat lekin
'qatīl' ab tak mire a.asāb se maz.hab nahīñ utrā

rañg aur nasl zaat aur maz.hab jo bhī hai aadmī se kamtar hai
is haqīqat ko tum bhī merī tarah maan jaao to koī baat bane

tum bhī 'tābish' ko jānte hoge
husn maz.hab hai ishq zaat us kī

maz.hab kā octopus
pakaḌ letā hai fard ko

har samt qatl-e-ām hai maz.hab ke naam par
saarī aqīdatoñ kī ḳhudā-parvarī kī ḳhair

mujh se kahā jibrīl-e-junūñ ne ye bhī vahi-e-ilāhī hai
maz.hab to bas mazhab-e-dil hai baaqī sab gumrāhī hai

ab to maz.hab koī aisā bhī chalāyā jaa.e
jis meñ insān ko insān banāyā jaa.e

maz.hab-e-ishq se mansūb ye bāteñ to ḳhārij kī haiñ
shām-e-hijrāñ maiñ kisī taur maiñ shirkat nahīñ karne vaalā

ain altāf hai maz.hab meñ hasīnoñ ke sitam
bad-shugūnī hai unheñ pūchhnā bīmāroñ ko

haañ ehtirām-e-ka.aba-o-but-ḳhāna chāhiye
maz.hab kī pochhiye to judāgāna chāhiye

maz.hab kī buniyād pe kyā taqsīm huī
ham-sāyoñ ne ham-sā.e hī lauTe the

ḳhamīr ek hai sab kā to ai zamīn ai maañ
zabān-o-maz.hab-o-qaum-o-vatan ye sab kyā hai