Tags-Mehboob

dil phaTne lagā hai yād-e-mahbūb
aa tujh ko hī ab gale lagā.ūñ

ḳhud hī rañg-e-ruḳh-e-mahbūb uḌā jaatā hai
ham to rūdād-e-ġham-e-ishq sunāte bhī nahīñ

idhar duḳhtar-e-raz kī hai kāfir javānī
udhar husn-e-mahbūb-e-sidq-o-safā hai

ajab terī hai ai mahbūb sūrat
nazar se gir ga.e sab ḳhūbsūrat

ġhul thā zahe husain kī shaukat zahe vaqār
goyā khaḌe haiñ jañg ko mahbūb-e-kirdgār

vo apne apne tamām sāthī, tamām mahbūb le ke aa.eñ
to mere hāthoñ meñ haath de de hameñ bhī izn-e-mubāhla hai

gum hai yuuñ fikr-e-kā.enāt meñ dil
yād-e-mahbūb se bhī ġhāfil hai

terī palkoñ pe ye ashkoñ ke sitāre kaise
tujh ko ġham hai tirī mahbūb tujhe mil na sakī

rah-e-mahbūb meñ allāh re shauq
qadam rakhtā huuñ aage kārvāñ se

shikast-e-mīnā o jām-e-bar-haq,
shikast-e-rañg-e-azār-e-mahbūb bhī gavārā

charāġh-e-bazm-e-ḳhudā huā hai ḳhudā ne mahbūb use kahā hai
ye shaam se lau lagī hai dil ko ki dekhne us bashar ko chaliye

kūcha-e-yār meñ jaanā ho to tark-e-anā hai pahlā qadam
ishq kisī se kyā kartā vo jo apnā mahbūb huā

naza.a ho lekin na sar ke kūcha-e-mahbūb se
laakh ho behosh par itnī tū hushyārī kare

jumbish-e-kākul-e-mahbūb se din Dhaltā hai
haa.e kis ḳhūbi-e-uslūb se din Dhaltā hai

raah chalte bhī ye pūchheñ ki kidhar aa nikle
jaise ham kūcha-e-mahbūb ke sākin hī nahīñ

zarra zarra hai tirī ḳhaak kā mahbūb mujhe
us kā ehsās mujhe yaañ hai magar vaañ to na thā

gar ho sharāb o ḳhalvat o mahbūb-e-ḳhūb-rū
zāhid qasam hai tujh ko jo tū ho to kyā kare

mahfil sī sajā.ī hai dīdār kī hasrat ne
har-chand tirā jalva mahbūb-e-tamāshā hai

mahbūb ke chehre ke muqābil bhī rahā par
is daur meñ aayā to huā chāñd mission bhī

mahbūb-e-ḳhudā ne tujhe nāyāb banāyā
qad sarv kiyā ruḳh gul-e-mahtāb banāyā