Tags-Mehboob

jism phūloñ sā thā siine meñ rakhā thā patthar
hausla dekhiye maiñ ne use mahbūb kiyā

khil jā.eñgī ye kaliyāñ mahbūb ke aamad se
jis raah se vo guzre gulshan meñ bahār aa.e

be-parastish bashariyyat nahīñ rah saktī hai
but ho mahbūb ho duniyā ho ḳhudā ho kuchh ho

kyuuñ vo mahbūb rū-ba-rū na rahe
kyuuñ nigāhoñ meñ guftugū na rahe

na chhoḌeñge mahbūb-e-ilāhī ke dar ko
nahīñ go ham is āstāne ke qābil

apnī tārīf to mahbūb kī kamzorī hai
ab ke milnā to use ek qasīda denā

dil kī taḌap ke vāste mahbūb nā-guzīr
rāh-e-vafā meñ ġham ke kināyāt ham-safar

mahbūb nagar ho ki ġhazal gaaño ho 'rāġhib'
dastūr-e-mohabbat nahīñ āsān kahīñ kā

tum mujhe bevafā.ī ke taane na do mere mahbūb maiñ bevafā to nahīñ
tum bhī maġhrūr ho maiñ bhī ḳhuddār huuñ aañkh ḳhud hī bhar aa.e to maiñ kyā karūñ

ab koī shanāsā bhī dikhā.ī nahīñ detā
barsoñ maiñ isī shahr kā mahbūb rahā huuñ

kaj-adā.ī ho sitam ho ki hoñ altāf-o-karam
apne mahbūb kī har chiiz bhalī hotī hai

jo dil bāñdhe vo jaadū jāntā hai
mirā mahbūb urdu jāntā hai

batā.iye kaf-e-mahbūb dast-e-qātil ko
lahū ke daaġh ko gul-kārī-e-hinā kahiye

nigah-e-nāz le ḳhabar varna
dard mahbūb-e-iztirāb huā

is dil ko hai mahbūb vahī dard kā naġhma
is dil meñ ta.ajjub hai ye kohrām huā kyuuñ

vahī ma.abūd hai 'nāzim' jo hai mahbūb apnā
kaam kuchh ham ko na masjid se na but-ḳhāne se

Duube na kabhī mere muqaddar kā sitārā
ik baar jo kar leñ mujhe mahbūb-e-ḳhudā yaad

hai sīrat-e-at.har mirā sarmāya-e-hastī
mahbūb-e-do-ālam kī hai ek ek adā yaad

aage kyā tum sā jahāñ meñ koī mahbūb na thā
kyā tumhīñ ḳhuub bane aur koī ḳhuub na thā

matlūb-e-duā haq meñ nahīñ apne kisū kī
tālib lab-e-mahbūb se dushnām kā huuñ maiñ