Tags-Mehboob

dekhī jo us mahbūb kī ham ne jhalak hai kal kī kal
paa.ī har ik ta.avīz meñ apne dil-e-bekal kī kal

misāl ban ga.ī mahbūb aur habīb kī zaat
ye aa.ina sar-e-ālam dikhā diyā ham ne

ġhuncha o gul kā dekh kar jauban
yād-e-mahbūb-e-gul-azār aa.ī

zahr mahbūb ke hāthoñ pā kar
yuuñ piyā maiñ ne davā ho jaise

ḳhat-e-mahbūb o pā-e-nāma-bar qismat se haath aa.e
lagā āñkhoñ se 'anjum' dam-ba-dam is ko bhī us ko bhī

ratjage vo bhī nashāt-e-ġham-e-mahbūb ke saath
husn vāloñ ne baḌā kaam kiyā ho jaise

hamāre dil kī hālat gesū-e-mahbūb jaane hai
pareshāñ kī pareshānī pareshāñ ḳhuub jaane hai

chāhā hai ajab Dhañg se chāhat bhī ajab hai
mahbūb ajab hai ye mohabbat bhī ajab hai

darīcha band rahtā hai ab us ke ghar kā ai 'sājid'
maiñ ab mahbūb ke kūche meñ jaanā bhuul jaatā huuñ

bhā.ī'shādāb' suno sher-o-suḳhan kā daftar
sirf mahbūb ke gāloñ se nahīñ chaltā hai

husn-e-sīrat hai lāzim-e-mahbūb
ḳhūbī-e-gul hai ḳhūbī-e-bū se

gulāboñ ke nasheman se mire mahbūb ke sar tak
safar lambā thā ḳhushbū kā magar aa hī ga.ī ghar tak

bad-gumānī kā agar mahbūb kī hotā na Dar
us ke pairoñ kā vo bosa letā rahtā raat bhar

ham ko ye gila mahbūb unheñ afsāna-e-bazm-e-aish-o-tarab
shikva ye unheñ ham un se dil-e-ranjūr kī bāteñ karte haiñ

āshiqoñ par hai dikhāne ko itaab ai 'jauhar'
dil meñ mahbūb ināyat kī nazar rakhte haiñ

un kā anjām hai sar-bulandī jin ke dil meñ nahīñ ḳhud-pasandī
jin ko mahbūb hai ḳhāksārī un ko aatī nahīñ ḳhud-satā.ī

saare aalam meñ ghuum kar dekhā
mere mahbūb ke sivā kyā hai

tujh ko fursat hī nahīñ apne jahāñ se mahbūb
tū nikaltā hai kabhī apne makāñ se mahbūb

jab huī ḳhushk to mahbūb kī kākul ne kahā
vo jo maike ga.iiñ un se yahī bābul ne kahā

ham ne mahbūb ke aivān meñ jā kar dekhā
chiin meñ misr meñ īrān meñ jā kar dekhā