Tags-Mehfil

chalā jaatā to huuñ maiñ bahrūp ban kar un kī mahfil meñ
kahūñgā kyā rasā.ī gar kahīñ muñh dekh kar hogī

ham us ko dekh leñge aur vo ham ko na dekhegī
nigāh-e-yār kyā mahfil meñ itnī be-ḳhabar hogī

un kī mahfil meñ unheñ sab raat bhar dekhā kiye
ek ham hī the ki ik ik kī nazar dekhā kiye

'shārib' ye kyā huā ki har ik shai hai ajnabī
vo ham nahīñ rahe ki vo mahfil nahīñ rahī

mahfil mirī āñkhoñ meñ tujhe DhūñD rahī hai
tū mujh ko kahīñ anjuman-ārā na banā de

bahut se yaad haiñ mahfil meñ baiThne vaale
kabhī to bhuul ke koī sar-e-mazār aa.e

merī mahfil meñ agar chāñd sitāre hote
vo bhī qurbān mirī jaan tumhāre hote

sab se ik tarz judā sab se ik āhañg judā
rañg mahfil meñ tirā jo hai vo ḳhalvat meñ nahīñ

bujh ga.ī sham.a kaTī raat ga.ī sab mahfil
ab akele hī kaTegā safar-e-parvāna

us kī mahfil ko chhoḌ aa.ī huuñ
ab vo tanhā hai kyā kiyā jaa.e

ye aksar 'shād' rakhtī hai mujhe ḳhush rañg lamhoñ se
mirī tanhā.ī terī raunaq-e-mahfil se aage hai

bulā kar tum ne mahfil meñ hameñ ġhairoñ se uThvāyā
hamīñ ḳhud uTh ga.e hote ishāra kar diyā hotā

ye tamāshā bhī mire dil ko jilā kar dekho
sham.a hasrat se jalī bar-sar-e-mahfil kyūñkar

kamāl-e-ishq kā yuuñ bhī kabhī andāz hotā hai
sū-e-parvāna sham.a chal ke ḳhud mahfil se aatī hai

thak ke sab so ga.e haiñ mahfil meñ
ḳhud hī suntā huuñ dāstāñ tanhā

ik umr se be-nūr hai ye mahfil-e-hastī
'ejāz' koī rañg to bharnā hī paḌegā

qabze pe haath rakh ke 'qalaq' ne milā.ī aañkh
kal har raqīb se sar-e-mahfil alag alag

kyā intizām hai mire lailā-jamāl kā
majnūñ ravāñ haiñ sab pas-e-mahmil alag alag

ham bhāñp ga.e the rañg-e-mahfil
kahne ko to be-ḳhabar ga.e ham

badal ga.ī hai nigāh-e-sāqī to rañg-e-mahfil badal gayā hai
na ab vo pahlī sī mai-kashī hai na vo mazā ab sharāb meñ hai