Tags-Mehfil

mast rahtā hai magar ab bhī dil-e-ḳhāna-ḳharāb
shaam ko baiTh ke mahfil meñ luñDhātā huuñ sharāb

mujh dil kī lagan tujh siiñ hai ai ḳhūbī-e-mahfil
parvāna naman sham-e-shabistāñ siiñ kahūñgā

jān-e-man ab ke ye ādāb haiñ tere kaise
bāñkpan merī ġhazal kā tirī mahfil meñ luTe

kahāñ tak apnī hī parchhā.iyoñ se bhāgeñge
ye log jo tirī mahfil meñ aa ke baiThe haiñ

jaane kyā mahfil-e-parvāna meñ dekhā us ne
phir zabāñ khul na sakī sham.a jo ḳhāmosh huī

ye sitam kī mahfil-e-nāz hai 'kalīm' is ko aur sajā.e jā
vo dikhā.eñ raqs-e-sitamgarī tū ġhazal kā saaz bajā.e jā

jis kā jī chāhā chalā aayā baġhair az ittilā.a
aap kī sarkār meñ bāzār-o-mahfil ek hai

terī mahfil kī fazā-e-rañgīñ
naqsh jaise koī chuġhtā.ī kā

bahut udaas hai ab rañg-e-mahfil-e-hastī
jabīñ se sub.h to zulfoñ se shaam paidā kar

āsmāñ jitne sitāre haiñ tirī mahfil meñ
apnī taqdīr kā hī koī sitāra na huā

vafā kā zikr agar aa.e us kī mahfil meñ
to baat jo bhī ho jaisī ho bas hamārī hai

halkī phulkī ek ġhazal
mahfil barham 'yāvar' chup

shoḳh ne barham nizām-e-mahfil-e-imkāñ kiyā
ḳhaak ne chheḌā hai gardūñ ne liyā hai thaam raqs

kahāñ mahfil meñ mujh tak bāda-e-gulfām aatā hai
jo merā naam aatā hai to ḳhālī jaam aatā hai

ham haiñ aise farāḳh-rū darvesh
mahfil-e-pādshah se aar nahīñ

kuchh na kuchh sochnā paḌtā hai sukūñ kī ḳhātir
un kī mahfil na sahī maut kī āġhosh sahī

na uThtī koī nigāh-e-ġhalat sar-e-mahfil
vo apne jalve ko ghar apne chhoḌ kar aate

apnī taqdīr thā barbād-e-mohabbat honā
mahfileñ aur bhī thiiñ aap kī mahfil ke sivā

jo kahā tujh se akele meñ kahā ai zālim
aabrū kab tirī mahfil meñ utārī ham ne

hai bikharne ko ye mahfil-e-rañg-o-bū tum kahāñ jāoge ham kahāñ jā.eñge
har taraf ho rahī hai yahī guftugū tum kahāñ jāoge ham kahāñ jā.eñge