Tags-Mehfil

qayāmat kyā ye ai husn-e-do-ālam hotī jaatī hai
ki mahfil to vahī hai dil-kashī kam hotī jaatī hai

kahāñ tak parda-e-fānūs se sar kī balā Taltī
azal se laag thī bād-e-fanā ko sham-e-mahfil se

nazar aa.e jab āsār-e-judā.ī rañg-e-mahfil se
nigāh-e-'yās' begāna huī yārān-e-yak-dil se

javānī kī kahānī dāvar-e-hashr
sar-e-mahfil kahī jaatī nahīñ hai

zarā ham bhī suneñ tum ne kahā kyā
adū se jab sar-e-mahfil ho ham hoñ

'riyāz' ik chulbulā sā dil ho ham hoñ
hasīnoñ kī bharī mahfil ho ham hoñ

kisī ne pūchhā 'nazīr' ko bhī tumhārī mahfil meñ baar hogā
kahā ki hogā vo bolā kab se kahā kabhū kā kabhī, na ab se

ho rañg pe mahfil to badaltī haiñ fazā.eñ
ai 'fazl' sañvar jaatā hai andāz-e-bayāñ aur

kuchh duniyā bhī bezār hai ab ham jaise vahshat vāloñ se
kuchh apnā dil bhī duniyā kī is mahfil meñ ghabrā.e hai

ik sham.a jalī to mahfil meñ har samt ujālā phail gayā
qānūn yahī hai fitrat kā parvāna jalā to kuchh bhī nahīñ

ajiib rañg thā majlis kā ḳhuub mahfil thī
safed posh uThe kaa.eñ kaa.eñ karne lage

apnī be-tābī-e-dil kā ḳhud tamāshā ban ga.e
aap kī mahfil ke bante ham tamāshā.ī to kyā

do ghaḌī ke vāste taklīf ġhairoñ ko na de
ḳhud hī baiThe haiñ tirī mahfil se uTh jaane ko ham

terī mahfil ye na hotī jo 'navā'
tū kahīñ kone meñ baiThā hotā

ho ke barham uThne vaale haiñ vo saare tishna-lab
aa.ī hai hisse meñ jin ke sāqi-e-mahfil kī baat

sar-phire karne lage haiñ jazb soz-e-dil kī baat
ab ḳhudā rakkhe to rakkhe aap kī mahfil kī baat

vo dil se tañg aa ke aaj mahfil meñ husn kī tamkanat kī ḳhātir
nazar bachānā bhī chāhte haiñ nazar milānā bhī chāhte haiñ

mahfil meñ jis ko bhī dekho rūThā rūThā lagtā hai
kaḌvāhaT hai āvāzoñ meñ koī mīThī baat nahīñ

mahfil-e-dost kī raunaq meñ haiñ 'shahzād' magar
dil kā ye haal ġharīb-ul-vatanī ho jaise

kiyā hai ashk-e-hasrat tū ne rusvā mujh ko mahfil meñ
kahā kis ne ki yuuñ mere gale kā haar ho jaanā