Tags-Mehfil

ajiib rasm hai yaaro tumhārī mahfil meñ
diye jalāne se pahle bujhā.e jaate haiñ

parda-e-sāz meñ bhī soz kā hāmil honā
sham.a se siikh sharīk-e-ġham-e-mahfil honā

har mahfil meñ karte haiñ
ochhī harakat ochhe log

zamāne ne lagā.īñ mujh pe lākhoñ bandisheñ lekin
sar-e-mahfil mirī nazroñ ne tum se guftugū kar lī

be-ḳhudī dekh ke merī sar-e-mahfil pūchhā
naam mash.hūr hai 'kaifī' isī sahbā.ī kā

ik minister ne sajā.ī mahfil-e-raqs-o-surūr
nāchne vaalī kā bil qaumī ḳhazāne se gayā

thakan tere badan kī uzr koī DhūñDh hī letī
hadīs-e-mahfil-e-shab kah rahī hai zulf barham bhī

ḳhayāl rakhte haiñ tanhā.iyoñ kā mahfil kā
ye kitne vāqif-e-ādāb haiñ mire aañsū

jaag uTThe the qurbat ke mausam tamām
phir sajī mahfil-e-rañg-o-bū der tak

tārīki-e-mahfil kā shikva tum karte ho ai dīvāno kyuuñ
ḳhud sham.a bujhā dī hai tum ne ḳhud-baḳht tumhārā phuuT gayā

duniyā ġharaz kī rah ga.ī ab is se kiyā ġharaz
chaliye ki lutf-e-shirkat-e-mahfil nahīñ rahā

marsiyoñ aur qasīdoñ se bharī hai mahfil
shahr-āshob se har rishta-e-dānish TuuTā

adū ke aate hī raunaq sidhārī terī mahfil kī
ma.āz-allāh insāñ kā qadam aisā bhī hotā hai

hamesha ġhair kī izzat tirī mahfil meñ hotī hai
tire kūche meñ jā kar ham zalīl-o-ḳhvār hote haiñ

mahfil meñ vo kartā rahā ik chor se hushiyār
aur us kā ishāra mire mehmāñ kī taraf thā

sar-e-mahfil maiñ yuuñ ḳhāmosh rah kar
sabhī logoñ ke tevar dekhtā huuñ

utar jaane de vahshat mere sar se habs-e-ḳhalvat kī
maiñ bit-tadrīj phir mānūs-e-mahfil ho hī jā.ūñgā

maiñ ḳhud hī bazm bhī aur ḳhud hī bazm-ārā bhī
ki nāgavār har ik mahfil-e-tarab thī mujhe

pas-e-parda tujhe har bazm meñ shāmil samajhte haiñ
koī mahfil ho ham us ko tirī mahfil samajhte haiñ

mahfil jamī huī hai tirī raah meñ koī
ai gardish-e-zamāna bas itnā ḳhayāl kar