Tags-Mehfil

garmi-e-mahfil faqat ik nāra-e-mastāna hai
aur vo ḳhush haiñ ki is mahfil se dīvāne ga.e

aap 'ārzū' ab ḳhāmosh raheñ kuchh achchhī burī khul kar na kaheñ
haiñ jitne muñh itnī bāteñ mahfil āḳhir mahfil hī to hai

ki aa ga.e haiñ tirī shor-o-shar kī mahfil meñ
ham apnī apnī ḳhamoshī se kitnā Dar ga.e haiñ

jahāñ insān kho jaatā ho ḳhud phir us kī mahfil meñ
rasā.ī kis tarah ho daḳhl kyūñkar ho guzar kyā ho

mahfil-e-dushman meñ jo guzrī vo mere dil se pūchh
har ishāra jumbish-e-abrū kā ḳhanjar ho gayā

sunā.e kise apnī ġham kī kahānī kidhar jaa.e vo terī mahfil se uTh kar
nazar ne tirī jis kā dil le liyā ho vo qismat kā maarā kahāñ chain paa.e

vo to mahfil meñ hī elān-e-vafā kar detā
baat mat pūchhiye phir kaise sambhālī maiñ ne

tujh se raushan hai charāġh-e-mahfil-e-dār-o-rasan
mujh se bhī is daur meñ zinda hai parvāne kā naam

tire aġhmāz kī ḳhū siikh lī ahl-e-muravvat ne
ki mahfil dard kī ab sāhab-e-mahfil se ḳhālī hai

sabhī parchhā.iyāñ haiñ saath lekin
bharī mahfil meñ tanhā ho rahā huuñ

ham-nafas aag na lag jaa.e kahīñ mahfil meñ
shola-e-sāz bhī hai shola-e-āvāz bhī hai

apne apne bas kī bāteñ ahl-e-mahfil jaan leñ
sham-e-mahfil ke qarīñ phir liije parvāne ga.e

kaise kaise haal meñ dekhā janāb-e-shaiḳh ko
mahfil-e-rindāñ meñ jab bhī va.az farmāne ga.e

be-ḳhudī meñ jab tirī mahfil meñ dīvāne ga.e
ahl-e-dil ahl-e-havas ke farq pahchāne ga.e

har ik mahfil meñ jaanā har kisī se baat kar lenā
gavārā kar nahīñ saktā mire me.aar kā halqa

milā vo raat mujhe mahfil-e-masarrat meñ
to maiñ adab se nahīñ dukh se duur jā baiThā

jab maiñ ḳhāmosh rahūñ raunaq-e-mahfil Thahrūñ
aur jab baat karūñ baat meñ dam ho āmīn

hujra-e-zāt meñ yā mahfil-e-yārāñ meñ rahūñ
fikr duniyā kī mujhe ho bhī to kam ho āmīn

ye to mat mahsūs hone dījiye
ajnabī haiñ aap kī mahfil meñ ham

mujhe na chheḌ qayāmat hai merī aahoñ meñ
ḳhudā rakhe tirī mahfil sajī-sajā.ī hai