Tags-Mehfil

dushman kī baat jab tirī mahfil meñ rah ga.ī
ummīd yaas ban ke mire dil meñ rah ga.ī

qad o gesū lab-o-ruḳhsār ke afsāne chale
aaj mahfil meñ tire naam pe paimāne chale

ujḌī jab se mahfil-e-yārāñ taur badal ga.e jiine ke
zaḳhm mirā pairāhan Thahrā dard mirā uslūb huā

tum ne 'azīz' us kī mahfil meñ shab na sahī lamhe tū guzāre
mustaqbil kī fikr to kyuuñ ho haal bhī hasrat-nāk nahīñ hai

sham-e-mahfil-e-yak-shab aur tūl-e-fikr itnā
kaun shaḳhs thā jis ne ārzū-e-fardā kī

duniyā se nirālā hai 'asrār' chalan apnā
tanhā.ī meñ mahfil hai mahfil meñ hai tanhā.ī

zeb-e-mahfil hai māh-ruḳh merā
har taraf hai sitāroñ kā jhurmuT

sham.a hogī sub.h tak baaqī na parvāne kī ḳhaak
ahl-e-mahfil kī zabāñ par dāstāñ rah jā.egī

gila mujh se thā yā merī vafā se
mirī mahfil se kyuuñ barham ga.e vo

na.ī jagah thī duur duur tak āḳhir par dīvāreñ shab kī
kuchh yāroñ ne barpā kar dī ik mahfil kuchh apne Dhab kī

aaj merī palkoñ par qudsiyoñ kā mela hai
ishq terī mahfil meñ dil kahāñ akelā hai

sab libāsoñ meñ haiñ poshīda gunāhoñ kī tarah
dil-e-bebāk bhī mahfil ke ta.iiñ aur nahīñ

gale meñ dil uchhal kar aa gayā sab ahl-e-mahfil kā
jab us ne be-niyāzī se nazar Daalī nashistoñ par

lāhūt kī ik lahar sū-e-karb-e-dil-e-ḳhāk
laayā koī jazba kisī mahfil se bahut duur

aah ham karte haiñ ai yaar ke mahfil vaalo
donoñ hāthoñ se jigar thaam lo apnā apnā

mahfil mere dam se mahfil phir bhī mujh meñ
ek bhayānak tanhā.ī bhī poshīda hai

jaam chhalkā to jam ga.ī mahfil
minnat-e-lutf-e-ġham-gusār kise?

maiñ is ke sivā kuchh nahīñ kahtā mire saaqī
'shārib' tirī mahfil se pashemān uThā hai

merī mahfil meñ kabhī aate nahīñ
ġhair ke ghar meñ guzārā ḳhuub hai

dil meñ hai har vaqt ik mahfil jamī
kyā huā gar maiñ kabhī tanhā huā