Tags-Mehfil

jab karegā garmiyāñ vo shola-rū
sham-e-mahfil dekh kar jal jā.egī

hosh se aarī rahī dīvāngī apnī 'zafar'
bā-ḳhabar mahfil meñ rah kar be-ḳhabar vāpas hue

is ālam-e-vīrāñ meñ kyā anjuman-ārā.ī
do roz kī mahfil hai ik umr kī tanhā.ī

maiḳhāne ke ādāb se vāqif jo nahīñ ham
mahfil se hameñ apnī uThā kyuuñ nahīñ dete

nahīñ hai mahfil meñ koī garmī hue haiñ dil sard mutriboñ ke
dhuāñ nikaltā hai uñgliyoñ se raubāb bhī bujh ke rah ga.e haiñ

tābānī-e-husn-e-ālam hai garmi-e-mohabbat ke dam se
parvāne agar mahfil meñ na hoñ phir sham.a kā jalnā mushkil hai

din guzar jaatā hai 'afshāñ' mahfil-e-ahbāb meñ
qasr-e-tanhā.ī meñ chupke se chalī aatī hai raat

ġhazab meñ aa.e to ātish mizāj ban jaa.e
vo mehrbāñ ho to mahfil-gudāz lagtā hai

zarūrī kyā har ik mahfil meñ baiTheñ
takalluf kī ravā-dārī se bachiye

shahr-e-vafā meñ haqq-e-namak yuuñ adā huā
mahfil meñ haiñ lage hue paivand TaaT ke

kis liye jashn-e-anā mahfil-e-idrāk meñ hai
merī tārīḳh mire dāman-e-sad-chāk meñ hai

bazm-e-āḳhir hai taqāza na kar ai mahfil-e-shauq
ab kahāñ saaf bhalā sāġhar o sahbā terā

tum ko saudā-e-mahfil-ārā.ī
aur hameñ justujū-e-tanhā.ī

parvāne charāġhoñ par girne lage mastī meñ
ye mahfil-e-hastī meñ kaun anjuman-ārā hai

jo kuchh ki dil meñ ho bharī mahfil meñ kah sake
har shaḳhs meñ ye jur.at-e-iz.hār bhī nahīñ

navā-e-shauq nikaltī hai ab bhī dil se magar
na vo upaj na vo mahfil na vo rabāb rahā

tasavvur is tarah aatā hai terā mahfil-e-dil meñ
mire hāthoñ meñ jaise ḳhud ba-ḳhud-paimāna aatā hai

ḳhudā hī jaane ki aane vaalī rutoñ meñ kyā ho jahāñ kī hālat
abhī ye naġhme na band karnā abhī ye mahfil sajā.e rahnā

ujālā ho to DhūñDūñ dil bhī parvānoñ kī lāshoñ meñ
mirī barbādiyoñ ko intizār-e-sub.h-e-mahfil hai

ye vīrānī tasavvur kī vo rañgīnī ḳhayāloñ kī
kabhī mahfil meñ ḳhalvat hai kabhī ḳhalvat meñ mahfil hai