Tags-Mehfil

kis ko batlā.īye vo rābta-e-nāz-o-niyāz
un kī mahfil meñ jo ai dīda-varāñ hotā hai

jo bhī minjumla-e-āshufta sarā hotā hai
zīnat-e-mahfil-e-sāhab-nazrāñ hotā hai

ḳhūn-e-ushshāq se jaam bharne lage dil sulagne lage daaġh jalne lage
mahfil-e-dard phir rañg par aa ga.ī phir shab-e-ārzū par nikhār aa gayā

mujhe ḳhabar thī gayā thā tū ġhair se milne
maiñ jān-būjh ke mahfil meñ be-zabān rahā

mauzū-e-suḳhan hai vahī afsāna-e-shīrīñ
mahfil ho koī raunaq-e-mahfil to vahī hai

kuchh din guzre 'ālī'-sāhib ālī-jī kahlāte the
mahfil mahfil qarya qarya sher sunāte jaate the

kis kī mahfil se uTh ke aayā huuñ
apne ghar meñ huuñ aur tanhā huuñ

parda-dār chehra-e-yūsuf nahīñ hai har naqāb
husn-e-lailā jalva-gar har ek mahfil meñ nahīñ

bazm kī kasrat se andesha mire dil meñ nahīñ
dil meñ us kī hai jagah mere jo mahfil meñ nahīñ

aah kab lab par nahīñ hai daaġh kab dil meñ nahīñ
kaun sī shab hai ki garmī apnī mahfil meñ nahīñ

hai barq-e-sar-e-tūr se dil shola-ba-dāmāñ
sham-e-sar-e-mahfil huuñ maiñ parvāna nahīñ huuñ

sham.a kī tarah se jalnā siikh auroñ ke liye
gar tamannā dil meñ hai to raunaq-e-mahfil bane

jo kabhī ham ko pūchhtā hī nahīñ
us kī mahfil meñ jā ke kyā hogā

maiñ bhī mushkil se uThā rashk bhī mushkil se uThā
dil vahīñ baiTh gayā jab tirī mahfil se uThā

terī mahfil ke alāva koī aalam hī nahīñ
vo kahīñ kā na rahā jo tirī mahfil se uThā

qalb-e-insāñ ko hai ab phir usī aalam kī talāsh
terī mahfil thī jahāñ dair-o-haram se pahle

mujhe fitrat navā par pai-ba-pai majbūr kartī hai
abhī mahfil meñ hai shāyad koī dard-āshnā baaqī

vo jis kī justujū-e-dīd meñ pathrā ga.iiñ āñkheñ
nazar ke sāmne ik din sar-e-mahfil bhī aa.egā

ye mahfil aaj nā-ahloñ se jo māmūr hai 'vāsif'
usī mahfil meñ koī jauhar-e-qābil bhī aa.egā

yuuñ sar-e-mahfil vaqār-e-husn ko rusvā na kar
us kā dāman thaam le apnā garebāñ chhoḌ kar