Tags-Mehfil

ik nazar dekh le shāyad tujhe yaad aa jaa.eñ
ham vahī haiñ tirī mahfil se nikal aa.e hue

vo jānte haiñ ki mahfil kī aabrū maiñ huuñ
jo mere bazm meñ aane pe tanz karte haiñ

huuñ rang-e-mohabbat se vāqif huuñ soz-e-mohabbat se vāqif
gulzār meñ bulbul maiñ thā kabhī mahfil meñ kabhī parvāna thā

maiñ gunahgār hī achchhī huuñ barā-e-mahfil
ye jo tum bechte phirte ho ḳhudā tum rakh lo

baat bhī suntā nahīñ huuñ vasl meñ dil kī 'zafar'
aise ḳhar-mastoñ ko mahfil se uThā detā huuñ maiñ

adā.eñ le ke aa.ī hai vo fitrat ke ḳhazānoñ se
jagā saktī hai mahfil ko nazar ke tāzyānoñ se

raqīboñ ko tum āñkheñ to dikhāte ho sar-e-mahfil
kahīñ aisā na ho ban jaa.e merī jaan par dekho

mirī nairañgiyāñ chhāne lagī haiñ rañg-e-mahfil par
bahut kuchh farq 'yāqūb' aa chalā hai dāstānoñ meñ

charāg jaltā huā duur hī se dekh liyā
rahe na ham tirī mahfil meñ aane jaane ke

hamesha sham.a bhaḌkegī sadā paimāna chhalkegā
tirī mahfil meñ ham chhoḌ aa.e haiñ josh-e-bayāñ apnā

jis ne dekhā hameñ dushman kī nazar se dekhā
terī mahfil meñ koī dost hamārā na milā

hijr-Taksāl meñ Dhālegā ġhazal ke sikke
terī mahfil meñ kabhī bol na sakne vaalā

muskurātā huuñ magar Dar hai kisī mahfil meñ
ashk āñkhoñ se na ho jaa.eñ ravāna aanā

saaqī tirī mahfil ko rañgīn kiyā jis ne
vo ḳhuun hai taqve kā yā jalva-e-mīnā hai

mahfil sī sajā.ī hai dīdār kī hasrat ne
har-chand tirā jalva mahbūb-e-tamāshā hai

hai vo jaan ab har ek mahfil kī
ham bhī ab ghar se kam nikalte haiñ

vo jin par faḳhr hai farzāngī ko nukta-dānī ko
tirī mahfil meñ aise chand dīvāne bhī aate haiñ

jab bhī mahfil meñ ġhazal apnī sunātā hai 'ḳhumār'
tabsire hote haiñ har sher pe yuuñ hai yuuñ hai

ham haiñ nigoḌe ham haiñ bhagoḌe ham haiñ nikamme ham kāhil
jis dam mahfil rañg pe hogī ham se rahā na jā.egā

jaane kyā mahfil-e-parvāna meñ dekhā us ne
phir zabāñ khul na sakī sham.a jo ḳhāmosh huī