Tags-Mehfil

kam-baḳhtī-e-vā.iz hai ki ho va.az kī sohbat
rindān-e-qadah-nosh kī mahfil ke barābar

kuchh ḳhabar le ki terī mahfil se
duur baiThā hai jāñ-ba-lab koī

mahfil-ārā.ī kī ḳhvāhish thī so dil us ke sabab
mahfil-ārā rahā vīrāñ rahā tanhā rahā dil

kitnī vīrān hai ye mahfil-e-shab
na sitāre na charāġh

sham-e-nazar ḳhayāl ke anjum jigar ke daaġh
jitne charāġh haiñ tirī mahfil se aa.e haiñ

ḳhuun ke rishte hue jab bhī kabhī nazr-e-anā
bhaa.ī ko mahfil meñ bhaa.ī kī kamī achchhī lagī

sar-e-mahfil maiñ kyuuñ ḳhāmosh rah kar
sabhī logoñ ke tevar dekhtā huuñ

parvāne ab apnī apnī aag meñ jalte rahte haiñ
sho.aloñ ke baTvāre se thā maqsad-e-sham-e-mahfil kyā

ijāzat māñgtī hai duḳht-e-raz mahfil meñ aane kī
mazā ho shaiḳh-sāhib kah uTheñ be-iḳhtiyār aa.e

bhāñp hī leñge ishāra sar-e-mahfil jo kiyā
tāḌne vaale qayāmat kī nazar rakhte haiñ

us ko mahfil meñ jo dekhā tapish-e-ġham kā sharīk
le liyā sham.a ne āġhosh meñ parvāne ko

kuchh ḳhud meñ kashish paidā kar lo ki mahfil tum se aañkh bhare
ye chaal baḌe ayyār kī hai ye chaal na ḳhālī jā.egī

nazar na ā.eñge ham qahqahoñ kī mahfil meñ
jo dekhnā hai to aañsū bahā ke dekh hameñ

shāyad mujhe nikāl ke pachhtā rahe hoñ aap
mahfil meñ is ḳhayāl se phir aa gayā huuñ maiñ

hamāre ba.ad añdherā rahegā mahfil meñ
bahut charāġh jalāo.ge raushnī ke liye

rañg-e-mahfil se fuzūñ-tar mirī hairānī hai
pairahan bā.is-e-izzat hai na uryānī hai

vo ek sher jo khultā hai saarī mahfil pe
vo jis pe khulnā hai us pe magar nahīñ khultā

jin se qaa.em thī tirī shoḳh-nigāhī kī adā
rañg-e-mahfil vo junūñ-ḳhez ishāre na rahe

nāz-o-andāz kī qīmat hai tire mere sabab
kis kī mahfil meñ bhalā aur ġhazab Dhāoge

mahfil-e-sāz-o-tarab matl.a-e-vīrāñ kyuuñ hai
sheva-o-sabr-o-sukūñ dil se gurezāñ kyuuñ hai