Tags-Mehfil

us maah kī mahfil meñ jo hai qahqaha-zan aaj
hotā hai bat-e-mai pe gumāñ kabk-e-darī kā

mahfil-e-duniyā ko Thukrā duuñ magar
jalva-farmā haiñ tirī ra.anā.iyāñ

dil ko be-rañg sī mahfil hī faqat bhātī thī
vahī vīrān se chehroñ meñ mujhe le ke chalā

un kī mahfil meñ dil nahīñ lagtā
jab vo auroñ meñ shādmāñ hote

jab jaam diyā thā saaqī ne jab daur chalā thā mahfil meñ
ik hosh kī saa.at kyā kahiye kuchh yaad rahī kuchh bhuul ga.e

pī ke bahkegā to rusvā.ī-e-mahfil hogī
vo jo kam-zarf hai maiḳhāne meñ aayā kyuuñ hai

tirā ḳhayāl to hai par tirā vajūd nahīñ
tire liye to ye mahfil sajā.ī thī maiñ ne

ik tamannā thī terī mahfil meñ
kyuuñ raheñ ham agar vahī na rahī

ham agar sach ke unheñ qisse sunāne lag jaa.eñ
log to phir hameñ mahfil se uThāne lag jaa.eñ

maiñ vo naġhma huuñ jise pyaar kī mahfil na milī
vo musāfir huuñ jise koī bhī manzil na milī

ham be-ḳhud un mahfil-e-tasvīr ab ga.e
ā.inda ham se aap meñ aayā na jā.egā

tamām umr ye afsurdagān-e-mahfil-e-gul
kalī ko chheḌte haiñ be-kalī se khelte haiñ

jalegā dil tumheñ bazm-e-adū meñ dekh kar merā
dhuāñ ban ban ke armāñ mahfil-e-dushman se nikleñge

jo bhī uThtā hai us kī mahfil se
ḳhasta o dil-figār uThtā hai

paañv rakhnā mujh ko mushkil ho gayā
thā ye hukm-e-mīr-e-mahfil kā nafāz

vahī fasurda sā rañg-e-mahfil vahī tirā ek aam jalva
mirī nigāhoñ meñ baar sā thā mirī nigāhoñ meñ baar sā hai

muntashir hone ko aatī hai jo bazm-e-ārzū
hausloñ kī phir na.ī mahfil sajā lete haiñ ham

sāqiyā hai tirī mahfil meñ ḳhudāoñ kā hujūm
mahfil-afroz ho insāñ to mazā aa jaa.e

jis se chāho pūchh lo tum mere soz-e-dil kā haal
sham.a bhī mahfil meñ hai parvāna bhī mahfil meñ hai

tere dīvānoñ kī mahfil meñ hai pahchān yahī
reg-e-sahrā se sivā ḳhāk-basar hotī hai