Tags-Mehfil

bharī mahfil meñ zabt-e-ġham bā-āsānī bhī karte haiñ
magar tanhā.ī meñ ashkoñ kī arzānī bhī karte haiñ

tum na the mahfil-e-aġhyār meñ sharminda na ho
muñh chhupā.e hue baiThā thā ḳhudā jaane kaun

mahfil meñ tere husn pe qurbān hogā kaun
dīvāne chal diye jo nikal kar idhar-udhar

maiñ jo ḳhāmosh thā ik shor thā har mahfil meñ
merī goyā.ī par ab saare suḳhnavar chup haiñ

hiqārat kī nazar se dekhte haiñ log mahfil meñ
ġharīboñ kī bhalā duniyā meñ kyā auqāt hotī hai

dūd-e-ātish kī tarah yaañ se na Tal jā.ūñgā
sham.a-sāñ mahfil-e-jānāñ hī meñ jal jā.ūñgā

sarsarī andāz se dekhoge to mahfil hī mahfil
ġhaur se dekhoge to har aadmī tanhā lagegā

yuuñ to sab duniyā meñ duniyā har-ik mahfil meñ hai
maiñ huuñ jis duniyā meñ vo duniyā tumhāre dil meñ hai

hai 'ālok' merī ġhazal jān-e-mahfil
par us ko jo bhaa.e vo rañgat nahīñ hai

mahfil-e-dostāñ se kab uThne ko chāhtā hai dil
soch rahā huuñ jā.ūñ ghar raat bahut guzar ga.ī

har lab pe gudgudī kā asar dekhtā huuñ maiñ
mahfil meñ un kī shoḳhī-e-āvāz dekhnā

un kī nazroñ ke sivā sab kī nigāheñ uTThīñ
mahfil-e-yār meñ bhī zīnat-e-mahfil rahiye

āñkhoñ āñkhoñ meñ vazāhat se huā kiiñ bāteñ
chup na mahfil meñ vo baiThā na maiñ ḳhāmosh rahā

karo be-nūr mahfil-e-imroz
turbatoñ par diye jalāte raho

hamārā zikr pahuñchte hī un kī mahfil meñ
zamāne bhar kī zabāñ par chaḌhā fasāna huā

yādoñ ke ik hujūm meñ rah kar patā chalā
tanhā.ī bhī to rakhtī hai mahfil kī āgahī

nazar karo vahdat o kasrat baham shāmil haiñ shīshe meñ
agar shīsha hai mahfil meñ to ye mahfil hai shīshe meñ

zaḳhm bhī nahīñ lagte ḳhuun bhī nahīñ bahtā
tiir us kī mahfil meñ kis balā ke chalte haiñ

us ne to bulāyā hai magar soch rahā huuñ
mahfil meñ koī ḳhāk-basar kaisā lagegā

kaam aa.egī mizāj-e-ishq kī āshuftagī
aur kuchh ho yā na ho hañgāma-e-mahfil sahī