Tags-Mehfil

mujh ko sharīk-e-mahfil bhī kab samjheñ vo
maiñ jo jān-e-mahfil hone vaalā huuñ

jab jaam diyā thā saaqī ne jab daur chalā thā mahfil meñ
ik hosh kī saa.at kyā kahiye kuchh yaad rahī kuchh bhuul ga.e

aap ne to ik jahāñ meñ ham ko rusvā kar diyā
aap kī mahfil meñ lekin aa ke ham chup-chāp haiñ

mire hāthoñ meñ bhī hai saaz lekin
abhī maiñ rañg-e-mahfil dekhtā huuñ

abhī hai duur har ik mahfil-e-tarab se 'suḳhan'
dil-o-nazar meñ abhī iztirāb itne haiñ

un kī mahfil meñ us ke charche haiñ
mujh se achchhā mirā fasāna rahā

Thaharne bhī nahīñ detī hai us mahfil meñ betābī
magar taskīn bhī jā kar usī mahfil meñ hotī hai

pā-ba-zanjīr sahī zamzama-ḳhvāñ haiñ ham log
mahfil-e-vaqt tirī rūh-e-ravāñ haiñ ham log

zindāñ zindāñ shor-e-anal-haq mahfil mahfil qul-qul-e-mai
ḳhūn-e-tamannā dariyā dariyā dariyā dariyā dariyā aish kī lahr

sahrā sahrā ham ne nok-e-ḳhār se talve sahlā.e
mahfil mahfil ham ne apnī vahshat kā iqrār kiyā

ye to ārā.ish-e-mahfil ke liye thā varna
ilm o dānish kā ham iz.hār nahīñ kar paa.e

harf aa.e na 'tamannā.ī' kahīñ saaqī par
aaj mahfil meñ chale aa.e haiñ ham jaam ke saath

ik zamāna ho gayā bichhḌe hue jis se 'surūr'
aaj usī ke sāmne huuñ aur bharī mahfil meñ huuñ

kaisī be-raunaqī hai mahfil meñ
ek is ke yahāñ na aane se

maiñ ki mai-ḳhāna-e-ulfat kā purānā mai-ḳhvār
mahfil-e-husn kā ik mutrib-e-shīrīñ-guftār

aap mahfil se chale jaate haiñ
dāstāñ baaqī rahī jaatī hai

mahfil ke hasb-e-zauq hai mutrib kā saaz bhī
mahfil badal ga.ī to tarāna badal gayā

phūloñ meñ zar luTā na gul-e-surḳh kā kabhī
be-faiz log raunaq-e-mahfil hue to kyā

qahqahe qulqul-e-mīnā ne lagā.e kyā kyā
mujh ko mastī meñ jo ronā sar-e-mahfil aayā

tishnagī se zarf ko ai sāqi-e-mahfil na tol
uTh ga.e to umr-bhar ko phir ye dīvāne ga.e