Tags-Mehfil

is mahfil-e-kaif-o-mastī meñ is anjuman-e-irfānī meñ
sab jām-ba-kaf baiThe hī rahe ham pī bhī ga.e chhalkā bhī ga.e

ā.īna-ruḳhoñ kī mahfil meñ jis vaqt ayaañ tum hote ho
sab aa.ina saañ rah jaate haiñ hairān tumhārī sūrat ke

kisī mahfil meñ bhī aise chalan paa.e nahīñ jaate
ki bulvā.e hue mehmān uThvā.e nahīñ jaate

us kī mahfil meñ baiTh kar dekho
zindagī kitnī ḳhūb-sūrat hai

duur baiThā huā sar-e-mahfil
rañg-e-sohbat ko dekhtā huuñ maiñ

dil ke ḳhāne meñ kashish ḳhuub milī hai raushan
us kī mahfil kā samāñ rashk-e-jināñ ho ki na ho

umiid aisī na thī mahfil ke arbāb-e-basīrat se
gunāh-e-sham.a ko bhī jurm-e-parvāna banā deñge

kyuuñ ahl-e-junūñ arbāb-e-ḳhirad kī mahfil meñ ḳhāmosh raheñ
vo apne hunar kī baat kareñ tum apne hunar kī baat karo

nīm-shab chāñd ḳhud-farāmoshī
mahfil-e-hast-o-būd vīrāñ hai

mirī sahbā-parastī morid-e-ilzām hai saaqī
ḳhirad vāloñ kī mahfil meñ junūñ badnām hai saaqī

baaġh kis kaam kā jis meñ gul o shamshād na ho
lutf detī nahīñ be-shīsha-o-sāġhar mahfil

jān-e-mahfil thā jo kabhī vo
kaisā tanhā tanhā guzrā

rifāqat ko kisī kī ro rahī huuñ
bharī mahfil meñ tanhā ho rahī huuñ

sa.ādat soz-e-dil kī bhī baḌī mushkil se miltī hai
sar-e-mahfil har ik sho.ale ko parvāna nahīñ kahte

yuuñ to pahuñche the ḳhushī oḌh ke mahfil meñ tirī
ghar talak dīda-e-namnāk pahan kar pahuñche

imtihāñ jab bhī ho manzūr jigar-dāroñ kā
mahfil-e-yār meñ ham-rāh-e-raqībāñ chaliye

be-naqāb aa gayā sar-e-mahfil
yaar ne aaj qatl-e-ām kiyā

is tarah baiThe haiñ vo aaj mirī mahfil meñ
jis tarah shīshe meñ tasvīr jaḌī hotī hai

mahfil meñ to bas vo saj rahā hai
apne ko jo kuchh samajh rahā hai

surḳh-rū kār-e-jahāñ mahfil-e-dil be-raunaq
bhar diyā rañg kahāñ ham ne kahāñ bharnā thā