Tags-Mehfil

bujh ga.ī raunaq-e-parvāna to mahfil chamkī
so ga.e ahl-e-tamannā to sitamgar aayā

un kī mahfil meñ be-kasī merī
bā.is-e-inqalāb ho ke rahī

maiñ rahīn-e-qalb-e-muztar tū charāġh-e-shādmānī
tirī mahfil-e-tarab meñ kahāñ dil-figār hotā

yaqīñ hai tishna-laboñ ko ki un kī mahfil meñ
vo jab bhī aa.egā bāda-ba-jām aa.egā

ahl-e-mahfil hoñge kyā ahl-e-basīrat ai 'shafīq'
mīr-e-mahfil hī ko be-fikr-o-nazar paatā huuñ maiñ

kal talak mahfil-e-ishrat meñ jo the sadr-nashīñ
qabr meñ aaj unheñ be-kas-o-tanhā dekhā

ḳhush huuñ ki kisī kī mahfil meñ arzāñ thī matā-e-bedārī
ab āñkheñ haiñ be-ḳhvāb to kyā ab ḳhvāb haiñ be-tābīr to kyā

ye dekh kar vo pareshāñ hai terī mahfil meñ
kisī ko us ne pareshān hī nahīñ paayā

shaam hai maiñ huuñ band kamra hai
DhūñDhte haiñ charāg mahfil ko

mahfil meñ raat nit-na.e chehroñ ke shor meñ
vo kaun thā ki jis se lipaTne nazar ga.ī

ham se to bas bāñdhe rakhtī sharm kī paTTī āñkhoñ par
chorī chorī mahfil meñ par aañkh laḌānī auroñ se

jo mahfil meñ pahchāntā tak na thā
tasavvur meñ baiThā hai aayā huā

mahfil meñ raat raat ujālā usī kā hai
sāġhar kī gardishoñ meñ havāla usī kā hai

dar dar bhaTakte rahne kī aadat nahīñ magar
mahfil se ye ġharīb nikālā usī kā hai

rūdād-e-shab-e-ġham yuuñ Dartā huuñ sunāne se
mahfil meñ kahīñ un kī sūrat na utar jaa.e

rañg-e-mahfil chāhtā hai ik mukammal inqalāb
chand sham.oñ ke bhaḌakne se sahar hotī nahīñ

aayā tirī mahfil meñ jo bhūle se mirā naam
ā.ankhoñ meñ zamāne kī vahīñ ḳhuun utar aayā

vo jise terā mustaqil ġham hai
terī mahfil meñ bhī udaas rahā

shaam hone ko hai jalne ko hai sham-e-mahfil
saañs lene kī bhī fursat nahīñ parvāne ko

mahfil mahfil 'az.har' umr guzārī hai
ham sā lekin tanhā tanhā kahīñ nahīñ