Tags-Mehfil

jaate haiñ mahfil se merī jā.iye
roknā kuchh merī fitrat bhī nahīñ

laa.ī tirī mahfil meñ mujhe ārzū-e-dīd
darpesh hai phir marhala-e-tūr kī tajdīd

behtar huā ki aa.e vo mahfil meñ be-naqāb
'ārif' ġhurūr-e-māh-e-jabīnāñ nikal gayā

jaao ābād karo apnī tamannāoñ ko
mujh ko mahfil kā tamāshā.ī banāyā na karo

baiTh jaatā hai vo jab mahfil meñ aa ke sāmne
maiñ hī bas hotā huuñ us kī is adā ke sāmne

shahr ho dasht ho mahfil ho ki vīrāna ho
ham jahāñ jaa.eñ vahī ḳhār-e-muġhīlāñ hoñge

yaad dilvā ke vo aglī bāteñ
bharī mahfil meñ na rulvā.iyegā

hasīr-e-ishq ko kab daḳhl is mahfil meñ hai 'kaifī'
bisāt us kī faqat bain-o-bukā āh-o-fuġhāñ tak hai

yaad ne aa kar yakāyak parda khīñchā duur tak
maiñ bharī mahfil meñ baiThā thā ki tanhā ho gayā

mahfil meñ kisī kī ham ne unheñ ik baar zarā dekhā hī to hai
yuuñ naam pe un ke dhaḌke hai dil goyā un se rishta hī to hai

un kī mahfil meñ hamesha se yahī dekhā rivāj
aañkh se bīmār karte haiñ tabassum se ilaaj

ham ko kyā kaam rañg-e-mahfil se
ham to haiñ duur ke tamāshā.ī

milā na jab koī mahfil meñ ham-nashīnī ko
maiñ ik ḳhayāl ke pahlū meñ jā ke baiTh gayā

shaiḳh āḳhir ye surāhī hai koī ḳhum to nahīñ
aur bhī baiThe haiñ mahfil meñ hamīñ tum to nahīñ

mahfil meñ maslahat se jo bāteñ na kar sakā
dānishvaroñ ne us ko nishāna banā diyā

ḳhushbū se kis zabān meñ bāteñ kareñge log
mahfil meñ ye savāl tujhe dekh kar huā

apne begāne sabhī haiñ mat uThā mahfil se yaar
gar kisī Dhab se huā yaañ maiñ bhī dāḳhil kyā huā

maiñ ne us shaḳhs se sīkhā hai takallum kā hunar
vo jo mahfil meñ bhī rahtā thā gurezāñ ho kar

jaan de kar tirī mahfil meñ kabhī jān-e-'azīz'
jaur kī tere mukāfāt bhī ho jā.egī