Tags-Mehfil

har yaad har ḳhayāl hai lafzoñ kā silsila
ye mahfil-e-navā hai yahāñ bolte raho

chāñd tanhā.ī ajab chiiz hai kyā jānte ho
tum to mahfil hī sajāte ho chale jaate ho

ham un ke rū-ba-rū rahe is maslahat se chup
mahfil meñ apne ijz-e-bayāñ par na aa.e harf

jo tum kahte ho mujh se pahle tum aa.e the mahfil meñ
to phir tum hī batāo aaj kyā kyā hone vaalā hai

saath rahtā hai sadā mahfil o tanhā.ī meñ
dil-e-ram-ḳhurdā magar ham se bhī kam khultā hai

dil yuuñ bujhā bujhā sā hī kho kar tumhārī yaad
mahfil meñ jaise sham-e-farozāñ nahīñ rahī

sach kahtā huuñ ik umr se pyāsī hai ye mahfil
paimāna-ba-kaf aa.iye ab der na kiije

gulshan-e-mashriq meñ manind-e-saba aa.ī hai tū
sub.h-e-raushan kā payām-e-jān-fazā laa.ī hai tū

mahram-e-dard-o-masarrat rāz-dār-e-sub.h-o-shām
mahfil-e-fitrat kī ḳhamoshī hai tujh se ham-kalām

dil pe kyuuñ kar faash ho jaate haiñ āzādī ke raaz
chheḌte haiñ kis tarah mahfil meñ.... bedārī kā saaz

yaad terī ik zamāne se hamārī dil meñ thī
tū yahāñ aane se pahle bhī isī mahfil meñ thī

ahl-e-mahfil ke liye mushkil hai ab tāb-e-nashāt
aaj paimānoñ se chhalkegī mai-e-nāb-e-nashāt

mahfil vahī makān vahī aadmī vahī
yā ham na.e haiñ yā tirī aadat badal ga.ī

jo azal meñ thā vahī nuur hai ki charāġh-e-mahfil-e-tūr hai
koī rahne vaalā zarūr hai mire dil meñ dard ke naam se

be-maqsad mahfil se behtar tanhā.ī
be-matlab bātoñ se achchhī ḳhāmoshī

tirī nazroñ hī tak thā sab salīqa ahl-e-mahfil kā
tire uThte hī jān-e-husn rañg-e-anjuman bigḌā

jo tirī yaad meñ har raat bapā hotī hai
aisī mahfil ko 'sahar' bazm-e-azā kahte haiñ

apnī ḳhātir chhoḌiye auroñ kī ḳhātir hī sahī
kam se kam mahfil meñ tum ko muskurānā chāhiye

dilrubā.ī ke jise ham ne sikhā.e andāz
jān-e-mahfil hai vahī ġhair ke kāshāne meñ

faiz-e-dil se mutrib-e-kāmil huā jaatā huuñ maiñ
bā.is-e-rañgīnī-e-mahfil huā jaatā huuñ maiñ