Tags-Mehfil

in kā andāz-e-nazar dekh ke mahfil meñ kabhī
mujh meñ bhī jur.at-e-iz.hār sī aa jaatī hai

dair-o-ka.aba meñ ghuum kar 'nayyar'
terī mahfil meñ aa gayā saaqī

ajab mahfil hai sab ik dūsre par hañs rahe haiñ
ajab tanhā.ī hai ḳhalvat kī ḳhalvat ro rahī hai

ġhazab ho gayā un kī mahfil se aanā
ghirā jā rahā huuñ tamāshā.iyoñ meñ

ye mahfil-e-ahl-e-dil hai yahāñ ham sab mai-kash ham sab saaqī
tafrīq kareñ insānoñ meñ is bazm kā ye dastūr nahīñ

marhamat se tirī ho jaa.eñ na mai-kash bad-dil
sañg-dil hai tirī mahfil kā nizām ai saaqī

bhaTaktā phirā maiñ idhar se udhar aur udhar se idhar aur kidhar se kidhar
dhuāñ-dār mahfil na jaam o subū meñ maza jo hai vo hai faqat apnī ḳhū meñ

'zeb' bhī arz-e-haqīqat meñ hai aksar mohtāt
ahl-e-mahfil meñ ye ehsās hai aam ai saaqī

tāb-e-ḳhalvat kaun lā saktā hai dil to miT chukā
kis qadar qātil tirā jalva bharī mahfil meñ hai

baneñge aaj phir sarmast sahbā-e-suḳhan 'raunaq'
qadam phir apnā qurb-e-mahfil-e-rindāna aa pahuñchā

us ajnabī se haath milāne ke vāste
mahfil meñ sab se haath milānā paḌā mujhe

maiñ ne ābād kiye kitne hī vīrāne 'hafīz'
zindagī merī ik ujḌī huī mahfil hī sahī

un kī mahfil meñ jaate Dartā huuñ
vaañ lagā.ī-bujhā.ī hotī hai

phūloñ kī chāñd tāroñ kī mahfil fareb hai
rañgīñ haqīqatoñ meñ bhī shāmil fareb hai

ruḳh se parda uThā de zarā sāqiyā bas abhī rañg-e-mahfil badal jā.egā
hai jo behosh vo hosh meñ aa.egā girne vaalā hai jo vo sambhal jā.egā

is hādse pe aap kā jo tabsira bhī ho
maiñ āshnā-e-mahfil-e-aish-o-tarab huā

mirī samt mahfil-e-ġhair meñ vo adā-e-nāz se dekhnā
jo ḳhatā-e-ishq kī hai sazā to mirī vafā kā sila bhī hai

shauq vāloñ kī hazīñ mahfil-e-shab meñ ab bhī
āmad-e-sub.h kī sūrat tirā naam aatā hai

yuuñ to dil vaale the mahfil thī magar aalam thā ye
us kā jaadū thā jo hairat ke sabab ḳhāmosh the

un kī mahfil meñ bhī huuñ dāman-kash-e-vahshat-ba-dil
har jagah ik ālam-e-ādāb-e-zindāñ haa.e haa.e