Tags-Mehndi

baat meñ kohna rivāyāt kā lutf
haath par rañg-e-hinā baaqī hai

ab paañv musāfir haiñ nafas marhala-e-zīst
ab vaqt ke hāthoñ pe na ḳhuuñ hai na hinā hai

ḳhabar-dār hāthoñ se jaane na paa.eñ
ye duzd-e-hinā maal maare hue haiñ

dil se be-sāḳhta umDe haiñ baḌhāo kaf-e-dast
aaj aañsū ko bhī ham-rañg-e-hinā pāoge

gul-o-lāla se shor-angez-tar haigī hinā terī
na ho dīvāna kyuuñ kar dekh tere dast-o-pā koī

raat jab guzrī to phir sub.h-e-hinā rañg huī
chāñd kī tarah mirā aks ḳhayālī niklā

haath rañgne kā lahū se ho gumāñ
shoḳh itnī bhī hinā achchhī nahīñ

ishq kī narm-nigāhī se hinā hoñ ruḳhsār
husn vo husn jo dekhe se nikhartā jaa.e

takalluf sāz-e-rusvā.ī hai ġhāfil sharm-e-ranā.ī
dil-e-ḳhūñ-gashta dar dast-e-hinā-ālūda uryāñ hai

kisī kā jalva-e-rañgīñ ye kahtā hai inheñ puujo
ye us patthar ke but haiñ jis pe pistī thī hinā merī

qātil se daḳhl kyā hai ki jāñ-bar ho apnā hosh
gar uḌ ke misl-e-tā.er rañg-e-hinā chale

bole vo 'hasan' kā ḳhuun mal kar
kyā shoḳh hai rañg is hinā kā

bevafā.ī us ne kī merī vafā apnī jagah
ḳhūn-e-dil apnī jagah rañg-e-hinā apnī jagah

mere sāñsoñ meñ machaltī hai hinā kī ḳhushbū
terī nau-ḳhez mohabbat kī nishānī jaise

ye kyā zarūr ho mizha-e-ishq ḳhūñ-fishāñ
kyuuñ dast-e-nāz ke liye rañg-e-hinā kī shart

hinā ko tarse hue kaf-e-pā kā jaal Tuk ruk ke pūchh lenā
kahāñ talak ābdāriyoñ meñ hai surḳh sabze kī dhaar likhnā

mil gayā ḳhaak meñ pis pis ke hasīnoñ par maiñ
qabr par bo.eñ koī chiiz hinā paidā ho

surḳhi-e-ḳhūn-e-shahīdāñ kī jhalak hai is meñ
dast-e-qātil pe ġhazab rañg hinā laa.ī hai

sabt huuñ dast-e-ḳhamoshī pe hinā kī sūrat
nā-shunīda hī sahī terā kahā huuñ maiñ bhī

nāḳhun-zan haiñ badal ye añgusht
ye sirf nahīñ hinā kī laalī