Tags-Mehndi

shāyad ukhaḌ gayā tirī yādoñ se rañg-e-lams
hāthoñ ko tere shauq-e-hinā hī nahīñ rahā

vo thā dushman mirā haarā to bahut zaḳhmī thā
maiñ ne hī us ke liye shāḳh-e-hinā māñgī thī

dil se nikle kahīñ pā-bosī-e-qātil kī havas
kaash vo ḳhuuñ ko mire rañg-e-hinā hī jaane

tā.ir-e-rañg-e-hinā kī sī tarah
dil na is ke haath se chhūTā gayā

mehñdī mire lahū kī mubārak ho aap ko
rañg-e-hinā hai is meñ aur bū-e-vafā bhī hai

ham ne har daur meñ mehnat ke sitam jhele haiñ
ham ne har daur ke hāthoñ ko hinā baḳhshī hai

us lab kā liyā bosa na kabhū haihāt na lipTā pāvoñ se
dil tujh se ba-rañg-e-pān-o-hinā ye bhī na huā vo bhī na huā

mere siine pe zarā dast-e-hinā rakh do tum
dil meñ ab ishq kā ḳhurshed javāñ hai jānāñ

kabhū rañg se hinā ke sar-e-dast-o-pā nigārīñ
na sivā-e-ḳhūn-e-āshiq kareñ ye nigār-bandāñ

haath lahrānā havā meñ us kā
aur paiġhām-e-hinā likh denā

haath se un ke Tapakte nahīñ mai ke qatre
ashk-e-ḳhūñ rotā hai ye rañg-e-hinā mere ba.ad

zaḳhm-e-tanhā.ī meñ ḳhushbū-e-hinā kis kī thī
saaya dīvār pe merā thā sadā kis kī thī

barg-e-hinā se likh ke nasīhat zamīn par
gulshan ko tere chhoḌ ke aurāq chal paḌe

unhī ḳhūbāñ kī hathelī pe raho
is liye tum ko hinā kahte haiñ

kisī kā jalva-e-rañgīñ ye kahtā hai inheñ puujo
ye us patthar ke but haiñ jis pe pistī thī hinā merī

zaḳhm har sañg hai us dast-e-hinā kā ham-rañg
ḳhuub us shoḳh kā andāz-e-pazīrā.ī hai

pī ga.ī ḳhuuñ zamīñ hazāroñ kī
muft phir shoḳhi-e-hinā kyā hai

kyā mirī vafāoñ kā ab lahū nahīñ miltā
tum ne apne hāthoñ meñ kyuuñ hinā lagā lī hai