Tags-Mehndi

le uḌī hai tire hāthoñ kī hinā pichhle pahar
mere uljhe hue afkār kī āñdhī hogī

zaḳhmoñ ko mire rañg hinā de ga.ī sabā
chāhā thā kyā bahār meñ kyā de ga.ī sabā

har taraf zardi-e-ruḳhsār nazar aatī hai
kahīñ raushan na milā rañg-e-hinā mere ba.ad

bahār ne kiyā mansūba-e-hinā-bandī
manāo jashn ki sab zaḳhm bhar ga.e apne

ye bhī nayā sitam hai hinā to lagā.eñ ġhair
aur us kī daad chāheñ vo mujh ko dikhā ke haath

shuā-e-sub.h bun-e-gosh meñ utartī hai
zavāl-e-mehr ki dast-e-hinā pe Thahrā hai

maiñ huā bhī jo bismil-e-teġh-e-jafā vale baaqī hai dil meñ abhī ye vafā
ki yaqīñ hai lahū mirā jā-e-hinā jo lage to na pā-e-sanam se chhuTe

muddat se vo ḳhushbu-e-hinā hī nahīñ aa.ī
shāyad tire kūche kī havā hī nahīñ aa.ī

ḳhuun āshiq hai yā hinā kā rañg
mere qātil ye zer-e-pā kyā hai

dil ḳhūñ-shuda-e-kashmakash-e-hasrat-e-dīdār
ā.īna ba-dast-e-but-e-bad-mast hinā hai

roñdī kisī ne pā-e-hinā.ī se merī naash
thī zindagī meñ mujh ko jo bū-e-hinā pasand

us ke hāthoñ se jo ḳhushbū-e-hinā aatī hai
aisā lagtā hai ki jannat se havā aatī hai

koī us ke duzd-e-hinā se ye kah de
mirā naqd-e-dil hai churāne ke qābil

ḳhūn-e-dil mujh se tirā rañg-e-hinā māñge hai
yā hathelī pe koī naqsh-e-vafā māñge hai

go piise hī Daale juuñ hinā vo
par chhoḌeñ na paañv bin chhue ham

dekhiye rañg-e-hinā rū-e-shafaq josh-e-bahār
tā.ir-e-ḳhvāb to hai tāb-e-safar hai ki nahīñ

abhī aur tez kar le sar-e-ḳhanjar-e-adā ko
mire ḳhuuñ kī hai zarūrat tirī shoḳhi-e-hinā ko

kyā hinā ḳhūñ-rez niklī haa.e pis jaane ke ba.ad
ban ga.ī talvār un ke haath meñ aane ke ba.ad

dil kho gayā hamārā kisī se milā ke haath
ho dastaras to kāTiye duzd-e-hinā ke haath

kaun thā vo jis ne apne ḳhuun se likkhā thā ḳhat
kis ke dil kā rañg is barg-e-hinā meñ qaid thā