Tags-Mehndi

manzar roz badal detā huuñ apnī narm-ḳhayālī se
shaam shafaq meñ Dhal jaatī hai rañg-e-hinā kī laalī se

hai fareb-e-dil bhī shāyad vaj.h-e-takmīl-e-vafā
ārzū-e-dil bhī ham-rañg-e-hinā karnā paḌī

zaḳhm ko phuul lahū ko jo hinā kahte haiñ
un ko shā.ir nahīñ shā.ir kā chachā kahte haiñ

ye dastaras kise ki kare us ko dast-bos
sau minnatoñ se paañv meñ us ke hinā lagī

hinā kā rañg ye hargiz nahīñ hai sach batā zālim
ye kis kā phuul sā dil tū ne paañv se masal Daalā

vo rañgīlā haath mere dil pe aur us kī mahak
sham-e-dil bujh sī ga.ī rañg-e-hinā ke sāmne

dekhnā baḌhtā huā ye ḳhvāhishoñ kā silsila
mauj-e-ḳhūñ dikhlā.egā rañg-e-hinā le jā.egā

hai be-hinā bhī panja-e-nāzuk par ik bahār
hote haiñ ba.az ba.az gul-e-nāravan safed

abhī to husn ke pairoñ pe hai jabr-e-hinā-bandī
abhī hai ishq par ā.īn-e-farsūda kī pābandī

uqda khulā ye dast-e-hinā band-e-yār se
meñhdī hai apne chor kī mushkeñ jakaḌ ga.ī

pahle hī hāth-pāoñ hasīñ kam na the magar
rañg-e-hinā se un kī phaban aur baḌh ga.ī

ِduzdī-e-dil kā yaqīñ ho kis tarah
kis ne ai duzd-e-hinā dekhā tujhe

lahū kī aag thī raushan har ik hathelī par
kisī bhī haath pe rañg-e-hinā kahīñ na milā

is kaf-e-pā par tire rañg-e-hinā
jin ne dekhā haath maltā hī rahā

kāñch ke paar tire haath nazar aate haiñ
kaash ḳhushbū kī tarah rañg hinā kā hotā

be-jāñ fan meñ jaan sī aa.e zaḳhm-e-tamannā taaza ho
yaad meñ rañg hinā kā lahke raqs meñ bād-e-sabā aa.e

rakh qadam mujh dīda-e-ḳhūñ-bār par
gar tujhe rañg-e-hinā darkār hai

huā hai ishq meñ ḳhāsān-e-haq kā rañg safed
ye qatl-e-ām nahīñ shoḳhi-e-hinā kahiye

lahū jo mushtāq vasl kā thā chhuTā na qadmoñ se us ke hargiz
agarche dho dho ke us ne kitnā ba-shakl-e-rañg-e-hinā chhuḌāyā

hinā ban ke maiñ chuum luuñ dast-e-nāzuk
tire haath haiñ rañg laane ke qābil